نجل أشرف مصيلحي يوجه رسالة مؤثرة لوالده: شايف حب الناس ليك.. وهفضل شايل اسمك وفخور
أعرب يوسف، نجل الفنان الراحل أشرف مصيلحي، عن اشتياقه الكبير لوالده، موجهًا رسالة مؤثرة له.
ونشر يوسف أشرف مصيلحي، مجموعة صور تجمعه بوالده الراحل، عبر حسابه الشخصي بموقع تبادل الصور والفيديوهات انستجرام، وعلق قائلًا: الله يرحمك يا أطيب وأجدع وأحن أب في الدنيا وكان نفسي تكون موجود وشايف حب الناس وروحك الحلوة الموجودة في كل حد فينا.
وتابع نجل أشرف مصيلحي: تشوف الناس كلها بتقول عليك إيه من أصغر واحد لحد أكبر واحد، وأنا فعلًا مش فاكر ولو مرة واحدة أنت عملت حاجة ضايقتني أو حتى شدينا مع بعض زي أي أب وابنه وده عشان إحنا كنا صحاب وكنت بتفهمني وعارف دماغي.
وأضاف: أنا عارف أنك دلوقتي مرتاح أكتر بكتير وأكيد مبسوط وأنت شايفنا كلنا متجمعين وحاسس أكيد بكل المحبة اللي كانوا موجودين اليومين دول وهيفضلوا موجودين على طول، ودلوقتي أنا هعرف اتكلم معاك وعارف أنك هتسمعني يمكن أكتر من آخر فترة كنت موجود وسطنا عشان كنت تعبان فا مش بعرف اتكلم معاك.
واختتم: أنا عايزك تعرف إني بحبك أوي وهفضل شايل اسمك وأنا فخور إنك أبويا لحد لما أجيلك إن شاء الله.. بجد بحبك أوي يا بابا وعارف أنك أكيد في الجنة إن شاء الله.
ورحل أشرف مصيلحي عن عالمنا، الأحد الماضي، بعد صراع مع السرطان لمدة 3 سنوات، ونتيجة حدوث مضاعفات أدت إلى تدهور حالته الصحية، ليرحل تاركًا خلفه حزنًا كبيرًا في قلوب كل محبيه.
