تامر حسني يدعم رامي نادر بعد وصفه بـ كومبارس: الكلمة ممكن تموّت.. وهبعتلك شباب تمرنهم تمثيل
علق الفنان تامر حسني، على منشور الفنان رامي نادر، بعدما وصفه أحد متابعيه بـ كومبارس، وحرص تامر على تقديم الدعم المعنوي له من خلال كلماته.
وكتب تامر حسني عبر حسابه الرسمي بموقع إنستجرام: لفت نظري البوست ده، أستاذ رامي أنت فنان محترم وردك حقيقي راقي، رغم تعرضك لكلام محبط أنت مردتش الإساءة بالإساءة، وده له اعتبار كبير أوي فوق ما تتصور عند ربنا قبل البشر، وممكن تكون جواك زعلت بس أكيد التعليق اللي زعلك ده ممكن يكون سبب في حاجة تفرحك قريب.
وأردف تامر حسني: وهتشوف كلامي وأنا شخصيًا مكنتش عارف إنك بتمرن تمثيل، وعرفت من البوست ده، وهبعتلك شباب يتمرنوا عندك وأتمنى أقابلك وأتعرف عليك ونفتح باب شغل مع بعض، وأتمنى من الشاب اللي كتبلك كده إنه يراجع نفسه وميحاولش يحبط حد تاني لإن الكلمة المحبطة فعلًا ممكن تموّت بجد ويكون تأثيرها أكبر من السلاح.
تامر حسني: التعليق السلبي ممكن يكون سبب في قتل حد نفسيًا
وأضاف تامر حسني: التعليق السلبي اللي أي حد بيكتبه بمنتهى البساطة وهو في بيته بيضحك، ممكن يكون سبب في قتل حد نفسيًا أو يكون سبب في تدمير أسرة أو سبب في جرح روح كانت فرحانة ومتفائلة وبسببك كل ده اتهد، ربنا يوفقك يا فنان يا محترم.
واختتم تامر حسني حديثه: يا شباب خلونا رحيمين على بعض عشان ربنا يرحمنا، عشان كل ما بقيت رحيم في كلامك هتلاقي ربنا بيسخرلك في عز زعلك وإحباطك ناس تفرح قلبك بالكلام الرحيم اللي يقويك على الدنيا.
رامي نادر يعلق على وصفه بـ الكومبارس
ومن جانبه، علق رامي نادر، الذي شارك في عدد من الأعمال الفنية مثل مسلسل طلقة حظ واللعبة، على تعليق سلبي كتبه له أحد متابعيه، متسائلًا لماذا يعطي رامي ورش تعليم التمثيل وهو كومبارس، وكتب رامي نادر عبر حسابه بموقع فيسبوك: سؤال وقفت أفكر فيه كتير، واتضايقت أكيد بس لاقيته قايل حضرتك، فـ عجبني الاحترام بتاعه.
وأضاف رامي نادر: وده كان ردي.. عندك حق.. بس الأدوار الكومبارس اللي أنا بعملها، أدوار كويسة وفيه ممثل كويس بيعملها ولا ممثل وحش؟.. أنا بدرب الناس على التمثيل وأتمنى يكون حظهم أفضل منى، لإن الممثل الكويس ممكن يفضل كومبارس أو في لحظة يبقى نجم.. حظ وتوفيق، لإنه ممثل كويس، وده اللي بدرّسه في الورشة.
