والدة داليا شوقي عن انتقادات مشهد ابنتها في سفاح الجيزة: المخرج قال مسؤوليتي وحرام تشيل شيلة غيرها
كشفت الفنانة منال الفطاطري والدة داليا شوقي، تفاصيل منشورها إلى معشر قريش وعبدة الأصنام، الذي ردت من خلاله على منتقدي ومهاجمي ابنتها داليا شوقي، بعد الهجوم الذي تعرضت له بسبب دورها في مسلسل سفاح الجيزة.
وقالت منال الفطاطري في تصريحات تليفزيونية: لن أدعي أني فقيهة في اللغة العربية ولكن عندي شوية خبرة وبحب اللغة بتاعتي وبستطعمها، وبحب أحس بكلامي وانتقيه وفيه فرق بين “إلى” و"يا"، وكان فيه فئة من الناس مش كتير بيئذوني أنا وبنتي وكنت بحاول أتغاضى وأسيب كل واحد يقول اللي عاوزه.. لقيت الموضوع زاد عن حده ولقيت تريقة وحاجات مش هتفيد ولا هتقدم بل بالعكس ممكن تئذي وتأخر.
وأضافت والدة داليا شوقي: لما أقول رأيي في حاجة يبقى من جوايا عاوزة رأيي يتسمع ويكون ذو قيمة عكس لما أشتم حد واتريق عليه وأنا اتحرقت على بنتي وناس كتير علقت وقالت لي أنتي هتكفرينا، لأ ده تعبير مجازي بمعنى شوية رحمة وأنا بقصد فئة من الناس مش بوجه كلامي للناس كلها، قصدت الناس اللي فيه في كلامها تطاول شديد ووراه عدم رحمة ورقة في القلوب.
وأردفت والدة داليا شوقي: إحنا كبرنا على معشر قريش وأبو لهب واللي هما الناس اللي معندهمش رحمة، لكن أنا مجبتش سيرة نسب النبي ده كان تخيل مغلوط من الناس لإن المقصود تعبير مجازي ودعمته بعبدة الأصنام وهو أيضا تعبير مجازي بمعنى أنكم لا تتفكرون فيها، لإن بنتي عملت المشهد بإحساس شديد اللهجة وكل خلية في جسمها بتتكلم من صوت ونظرات وأداء ولما أشوف حد متقمص ومتحرك وواكل الشخصية وعايش فيها غير لما أشوف واحدة زي تمثال فهل أنتم تعبدون الأصنام؟.
وأضافت والدة داليا شوقي: داليا حست بالمشهد وإحنا عندنا علم بجذور وخلفيات المشهد ودي واحدة عندها مشاكل في البيئة بتاعتها وكان ليها تاريخ مكتوب وحياتها صعبة، ونقد بنتي وجعني وده مش نقد ده تطاول.
المخرج في ضهرها والأخطاء بتحصل وبتعدي
واستكملت: مقلتش لداليا هكتب بوست، وأنا مفكرتش إني أكتب البوست ولكن حسيت إن الناس دي معندهاش رحمة وحرام خاصة إنها تعبت نفسها وبذلت مجهود والحمد لله المخرج نصرها وقال المشهد مسؤوليتي لإنه حرام تشيل شيلة مش بتاعتها، والمخرج في ضهرها والأخطاء بتحصل وبتعدي وفيه كتير دافعوا عنها وعلى راسهم كاملة أبو ذكري.
