منى عبد الغني توجه رسالة إلى الفتيات: ما تخليش شاب يضحك عليكي ويركع على رجله يديكي خاتم
وجهت الفنانة والإعلامية منى عبد الغني نصيحة ورسالة إلى الفتيات مطالبة إياهن بالمحافظة على كرامتهن وأن يعودن إلى قيم وعادات مجتمعنا الشرقي.
وقالت منى عبد الغني في برنامجها الستات ما يعرفوش يكدبوا عبر قناة سي بي سي: لكل بنت هقول لك كلام يحفظ كرامتك ويعززك، اوعى تخلي شاب يضحك عليكي بكلمتين، ويقول لك أنتي مراتي وهتجوزك، ويجي وسط صحابك يعمل لك مفاجأة ويركع على رجله ويديكي خاتم وصحابك يفرحوا ويهللوا ويقولوا دي محظوظة.
وأضافت منى عبد الغني: الحاجات دي جديدة على مجتمعنا وثقافتنا “وليس البر بأن تأتوا البيوت من ظهورها ولكن البر من اتقى واتوا البيوت من أبوابها واتقوا الله لعلكم تفلحوا”،.. هو الشخص ده لما بيعمل لك المفاجأة دي بتقولي لوالدك إيه! أنا اتخطبت؟.
وتابعت منى عبد الغني: اللي بيحب حد بيخبط على الباب ولو كنتي سهلة في العلاقة سنة واتنين هيكون عارف إن مش ممكن تكوني أم ولاده والجوازة هتفشل ده لو اتجوزك، الواحد لو اتقدم لواحدة بشكل رسمي بيكون فيها احترام وكرامة.. الراجل بيحترم البنت اللي بتحترم أهلها وبتحافظ على نفسها وبيشيلها في عينه لأنه عارف إنها هتصون بيته وولاده وممكن يخرج ويسهر بس يرجع يقول لا دي ما تنفعنيش هو عاوز واحدة تصون بيته.
واختتمت منى عبد الغني حديثها قائلة: مفيش مشكلة تحبوا بعض في النور في حدود الاحترام والأسرة.. عاوزين نرجع لقيمنا الجميلة ونستحي من ربنا ونرجع لعاداتنا وتقاليدنا.
