خالد زكي: مايصحش نصنف الفنانين ونرخصهم.. وأتمنى إضافة مادة دراسية عن آداب المرور
أعرب الفنان خالد زكي عن استيائه بسبب تصنيف الممثلين وفقًا لأجورهم المادية، مؤكدًا أنه لا يجب التقليل من أي شخص عامل بالمجال الفني.
وقال خالد زكي، خلال ندوة تكريمه بمهرجان الإسكندرية السينمائي لدول البحر المتوسط: التليفزيون بقى قريب جدًا من التصوير والإخراج السينمائي، ولكن الممثل السينمائي والتليفزيوني ده دلوقتي مبقاش موجود، وهناك تصنيف من نوع آخر وأنا ضده تمامًا، إنه نصنف الفنانين والمخرجين والسادة العاملين بالمجال الفني درجات، درجة أولى وتانية وتالتة وبالأجور، ده كلام مش مظبوط وميصحش.
وأضاف: إحنا لازم نفتخر بالعاملين في مجالنا الفني والإعلامي ونعليهم ونقدرهم ونقدمهم في أحسن حال ومستوى، ولازم نقدرهم ماديًا أمام العالم كله، لأن الواجهة الحقيقية والإعلامية لمصر هي الفن والإعلام والصحافة وكل شيء، ومحدش يقدر يصنف ومينفعش نرخص العاملين في المجال الفني والإعلامي أمام العالم، ده ميصحش.
وأضاف خالد زكي، أنه يتمنى إضافة مادة تُدرّس المرور وآدابها والقيادة، خلال المناهج الدراسية للأطفال.
خالد زكي: الفن مصدر رزقي الوحيد.. وبقلق لو حصلي حاجة أولادي يحتاسوا
ومن ناحية أخرى، أكد الفنان خالد زكي، أن الفن هو مصدر رزقه الوحيد، قائلًا: الهاجس الأكبر اللي بيدور في ذهن الواحد كثيرًا إن أنا ليه معنديش أي مشروع تجاري خالص؟ أنا مصدر رزقي الوحيد هو التمثيل، مفيش 10 جنيه بتجيلي من الناحية التجارية.
وأضاف: وبقلق لو الواحد حصله حاجة أولادي يحتاسوا، لأن عيشتهم كويس جدًا ومبسوطين، ولكن بدعو ربنا أن يوم ما ييجي اليوم بتاعي أبقى واقف على رجلي، ومحتاجش أي حد لا ماديًا ولا معنويًا.
