غموا عيني وحطوني في عربية وسبوني على الدائري.. ننشر التحقيقات في قضية خطف مواطن بالمرج | خاص
ينشر القاهرة 24 التحقيقات في القضية التي حملت رقم 1536 لسنة 2022 جنايات المرج والمقيدة برقم 1336 لسنة 2022 كلي شرق القاهرة، عن خطف متهم وإجباره على توقيعات إيصالات أمانة، بعد اتهامه بالدلوف إلى منزل إحدى السيدات ومراودتها عن نفسها لإقامة علاقة غير شرعية معها.
استدراج مواطن وخطفه
واستمعت جهات التحقيق إلى أقوال المجني عليه وهو شخص يدعى سيد إبراهيم محروس ويعمل صاحب شركة الحمد لاستيراد والتصدير ومقيم بالحرفيين بمنطقة السلام، والذي استُدرٍج من قبل المتهمين على خلفية شراء سيارة من أحد المتهمين، وجاءت أقواله كالآتي:
قال المجني عليه: اللي حصل إني أنا شغال سمكري وفاتح مركز صيانة في الحرفيين وبشتري العربيات اللي عامله حوادث، واتصل بيا واحد قالي أنا عندي عربية نيسان عامله حادثة تعالى اتفرج عليها قولتلوا ابعتلي صورها على التليفون، راح بعتهالي قولت ودي تسوى مائة ألف قالي ماشي قالي تعالي خذها يوم الأحد، قولتلوا لا مش هينفع خليها يوم الاثنين وهو كان مصمم أروح له يوم الأحد، يوم الاثنين قالي تعالى عند المرج الجديدة، هاجي أخدك وبعد كدا اتصلت بيه قولتله أنا وصلت عند المرج في شارع الأنابيب.
وأكمل المجني عليه: وأنا سبت العربية قدام محل العصير وقالي امشي قدام شويه هتلاقي سلم خشب اطلع عليه عدي الناحية التانيه هتلاقينى واقف مستنيك روحت طلعت وعديت قالي انت فين قالي اطلع قدام شويه وركبت معاه في عربية سوزوكي حمراء راحوا واخدني في العربية على منطقه اسمها المرج الجديدة وبعدين وصلنا عند بيت وقولتلهم فين العربية قالولي العربية عند الجامع قالولي تعالى خش البيت اشرب حاجة قولت لهم لا عشان كنت مستعجل ودخلت البيت وأنا جوة البيت وقاعد لقيت اثنين نازلين من على السلم قالوا فين الفلوس اللي معاك قولتهم معيش غير ألف وخمسمائة جنيه راحوا وخدينهم مني وخدوا مني التليفون.
وأردف المجني عليه: وقالولي افتح التليفون فرحت فتحت الباسورد وقلعوني هدومي وراحو مصوريني بالتليفون بتاعي وبعدين قالولي عاوزين 250 ألف عشان مینشروش الصور اللي صوروهالي وقولتلهم مش معايا وقولتلهم معايا عربية أكتبهالك بيع بيها قالولي لا إحنا عاوزين الفلوس وبعد كدا خدوا مني المفتاح بعد ما كنت حطه في الشورت بتاعي علشان مش يخدوه، وبعد كدا توهتهم شوية على مكانها وبعد كدا قولت لهم على مكانها بعض ما فضلوا يضربوا فيا، وبعدين جابوها عند البيت وخدوا منها الفلوس 150 ألف، وكذا النضارة والسبحة والورق بتاعي الخاص بيا، وبعدين مضوني على إيصالات أمانة تحت إکراه وضرب، وبعد كدا راحوا ملبسني ومغمضين عيني وراحو حطني في عربية وسبوني على الدائري، وبعد كدا رحت عملت محضر باللي حصل.
وقضت محكمة جنايات شمال القاهرة بالسجن سنة للمتهمين عن تهمة استدراج المجني عليه وخطفه والتعدي عليه، وإجباره على توقيع إيصالات أمانة.
