كان عايز يعمل علاقة مع أم عمر.. ننشر التحقيقات في قضية خطف مواطن بالمرج| خاص
ينشر القاهرة 24 التحقيقات في القضية التي حملت رقم 1536 لسنة 2022 جنايات المرج والمقيدة برقم 1336 لسنة 2022 كلي شرق القاهرة، عن خطف متهم وإجباره على توقيع إيصالات أمانة بعد اتهامه بالدلوف إلى منزل إحدى السيدات ومراودتها عن نفسها، لإقامة علاقة غير شرعية معها.
استدراج مواطن وخطفه
وحصل القاهرة 24 على أقوال أحد المتهمين في واقعة خطف مواطن بالمرج، وجاءت كالآتي:
اللي حصل أنا عارف عمر عن طريق والده لأن والده كان شغال معايا على فرشة، وفي يوم جالي إسلام وائل اللي هو صاحبي وقالي إن عمر صاحبنا جالي وقالي إن في واحد بيكلم أمه على التليفون وعايز يعمل معاها علاقة غير شرعية، رحت أنا قلت لإسلام اللي انت عايزة أنا معاك فيه، وقالي احنا عايزين نستدرجه، وأنا وافقت وقلتله هروح أجيب محمد.ح اللي معاه العربية عشان نروح نشوف الراجل ده عايز ايه، وقابلت محمد.ح، ورحت أنا وهو وإسلام.و لبيت أم عمر في الخصوص عشان نعرف هو الراجل ده عايز إيه وأفهم القصة الأول.
وتابع: اتفقنا كلنا مع بعض إن إحنا هنجيبه البيت في المرج عند أم عمر، وأم عمر اتفقت معانا إنها هتجيبه وقالتلنا إنه اتصل بيها، وعايز يعمل معاها علاقة غير شرعية، وقالتله العيال موجودة خليها في وقت تاني وبعدين قالتلي تعالى البيت في المرج عشان نبقى كلنا موجودين عشان نصوره، واتفقت معاه يوم الاتنين أو التلات مش فاكر بالضبط وبعدين الراجل جه في نفس الميعاد اللي أم عمرقالتله عليه وفي اليوم ده ماشيين أنا وعمر وإسلام ومحمد قالنا تعالوا طلعا البيت هنلاقي الراجل موجود وطلعنا البيت في المرج لقينا رجل لابس فانلة بحمالات وشورت وهي بالعباية بتاعتها رحت أنا واللي معايا مصورينه عشان ميقربش الست دي تاني، وقالنا متنشروش الفديوهات دي ورحنا ضاربينه كلنا بس مش تعذيب وقالنا خدوا اللي انتوا عايزينه قولناله مش عايزين حاجة عايزينك تبعد عن الست دي واللي كان معايا خدوا منه الحاجات اللي اتعرضت علينا دي بس مخدناش فلوس منه وراح محمد.ح، جاب العربية بتاعته من جنب المرج بشوية جابها لغاية البيت عند عمر وقالنا عشان تضمنوا حقكم، خدوا وصل أمانة عليا، ومضى على إيصالات أمانة بس مش فاكر كام واحد وقالنا أنا مش هكلم الولية دي تاني وبعد كده لبس هدومه ونزل ركب عربيته ومشي وإحنا كل واحد روح البيت وأنا اتقبض عليا امبارح في اول دخلة الخصوص وجابوني على قسم المرج وجابوني على النيابة النهاردة وده كل اللي حصل.
وكانت محكمة جنايات شمال القاهرة، قضت بالسجن سنة للمتهمين باستدراج المجني عليه وخطفه والتعدي عليه، وإجباره على توقيع إيصالات أمانة.
