شيرين: قلبي بيتقطع بسبب اللي بيحصل في غزة.. وكلنا لازم نشتغل ومنقفش
علقت الفنانة شيرين على الأحداث المريرة التي يمر بها شعب فلسطين جراء الاحتلال الإسرائيلي على غزة وموت مئات الأطفال الأبرياء يوميًا.
وقالت شيرين في تصريح لـ القاهرة 24: الواحد قلبه بيتقطع كل يوم وده سبب من أسباب حزني الشديد وبقيت انطوائية لإن مفيش حاجة في إيدي غير إني أقول حسبي الله ونعم الوكيل، ومش هدعي على حد لإني مهما دعيت الكلمات أقل بكتير من اللي بيحصل في الأطفال والشباب والستات الغلابة وأنا بحط أحفادي مكانهم والله لا يسامحهم وحسبي الله ونعم الوكيل.
وأضافت شيرين: المجتمع الوطني كله اللي بيقدر عليه بيعمله وإحنا كمصريين الريس مش مقصر معانا في حاجة والناس بتتبرع واللي يقدر بيعمل وناس بره بتتبرع وتبعت فلوس ومعونات، ولكن مع الأسف 20 % من المعونات اللي راحت أوشكت على الانتهاء.
شيرين: إحنا في مذبحة
وأردفت شيرين: إحنا في مذبحة ومعنديش حاجة أقولها غير حسبي الله ونعم الوكيل، والناس بتقول يا ريت العرب طيب ما هما اتحدوا الحمد لله إيه اللي حصل مفيش حتى هدنة، وفيه ناس تحت الأنقاض لسه ما طلعوش اللي بيحصل شيء خارج العقل.
كما رفضت الفنانة شيرين فكرة عدم امتناع الفنانين عن أعمالهم دعمًا لغزة، قائلة: كلنا لازم نشتغل ونموت نفسنا من خلال شغلنا، علشان نقول لهم انظروا يا عالم إلى أهل فلسطين وأهل غزة اللي بيتضربوا من غير أي سبب ومستشفياتهم ومدارسهم بتضرب.
آخر أعمال شيرين
ويُشار إلى أن شيرين شاركت في الموسم الرمضاني 2023 من خلال ثلاثة أعمال، حيث شاركت الفنان محمد سعد في بطولة مسلسل إكس لانس، ومع الفنانة منة شلبي في مسلسل تغيير جو، كما شاركت في مسلسل سوق الكانتو مع أمير كرارة.
