ياسمين من أهل بيتي.. أحمد العوضي يكشف هل يقبل التنمر على زوجته؟
كشف الفنان أحمد العوضي كيفية تعامله مع انتقادات الجمهور التي قد توجه له، مؤكدًا أنه لا ينزعج من الانتقادات مطلقًا.
وقال أحمد العوضي في لقاء له: مش بزعل من الانتقادات خالص، بشوف من حق أي حد يقول أي حاجة، وأنا مش برد، الجمهور له يقول أي حاجة ده حقه، أنا بعرض منتج حقك تقول اللي أنت عاوزه، ولو حد شتمني مش برد، يبقى أنا مقصر في حق حاجة وهو مش بيحبني علشانها، ليه أشتم واحد ما أعرفوش هل دي رجولة؟.
وأضاف العوضي: عاوز تشتمني اشتمني براحتك أنت تعرفني لكن أنا لأ، وأنا أقسم بالله مش بزعل حقه ما يحبنيش هو الحب بالعافية، هو لازم كله يحبني، لكن أنا ممكن أكون عاوز اللي ما يحبنيش يحبني، ومش هقعد أرد على الناس ده مش صح، وبعتز بحب الناس ليا في الشارع.
وسألته المذيعة حال إذا كانت الانتقادات التي توجه له تحمل تنمرًا على زوجته ياسمين عبد العزير هل يقبل، ليرد: ياسمين من أهل بيتي.
أحمد العوضي: النجومية مش دايمة
كما تحدث أحمد العوضي عن تأثير النجومية عليه قائلًا: النجومية مش دايمة، وقيدتني لأني ممكن معرفش أقعد في مكان براحتي، وأحيانًا بكون عاوز أعمل حاجة في الشغل، أو مكالمة تليفون ما أعرفش أعملها في مكان عام، لكن أنا مش بضايق من الناس وبحب حب الناس ليا، واحد بيحبك هتقلب وشك عليه؟ أيًا كان أنت بتعمل إيه هو حقه يتصور معاك لأنه بيحبك، وبعدين تزعل لما محدش يعبرك ما ربنا كان مديك نعمة، ما البطران يحيب قطران.
