رانيا يوسف: السنة اللي فاتت مكنش عندي في البنك غير 70 جنيه.. ولو بنتي عايزة تتحول لراجل هدعمها
كشفت الفنانة رانيا يوسف، عن تعرضها لأزمة مالية خلال العام الماضي بسبب عدم دخولها في أي أعمال فنية، بجانب الكشف عن رأيها في تعدد الزوجات وقرارات ابنتيها.
وقالت رانيا يوسف في تصريحات تليفزيونية: السنة اللي فاتت مكنش عندي غير 70 جنيه في البنك، لأن مكنش عندي شغل ومسؤولياتي كتير جدًا ومفيش فلوس، وسندي الوحيد ربنا، في عمل أو عملين في حياتي مكنتش راضية عليهم ولكن كان لازم أشتغل علشان في مسؤوليات.
وتابعت رانيا يوسف: مقابل الجمال اللي اداهوني ربنا أنه حرمني ألاقي شريك حياتي، وزهقت من كتر الكذب والتلون وطول الوقت مبيبقوش حقيقيين، البدايات بتبقى لطيفة وبعد كده بكتشف أن الشخص مش حقيقي.
وعن رأيها في تعدد الزوجات، فعلقت رانيا يوسف قائلة: مقبلش أبقى ضرة ولا حد يتجوز عليا، لأن الموضوع مشاعر ست تانية بتتأذي، وأنا مبحبش آذي مشاعر حد ولا حد يأذيني حتى لو حبيت الشخص، ومن فترة كان في مشورع جواز وكان قائم على أن الشخص هينفصل والقرار كان واخده من قبل ما نتعرف، ولما اتعرفنا تقريبًا هي عرفت وقررت تصلح العلاقة، ومش هيحصل إني أبقى سبب في خراب بيت حد ولا آذي مشاعر واحدة.
وأضافت رانيا يوسف: وقت ما كنت شغالة مضيفة طيران حبيت كابتن طيران كنا بنطلع رحلات مع بعض وكنت رومانسية أوي، واتخطبنا وبعد سنة ونص اكتشفت أنه متجوز ومخلف.
رانيا يوسف: المجتمع مالوش دخل في حياتي الشخصية
وأكدت الفنانة رانيا يوسف، أنها تدعم ابنتيها في أي قرار في حياتهما الشخصية، قائلة: لو بنتي عايزة تتحول لراجل هدعمها في أي قرار هي عايزاه، أي قرار يسعدها ويريحها ومبيأذيش حد، والمجتمع مالوش دخل في حياتي الشخصية ولا أولادي.. أنا لا أملك بناتي وهما اللي هيتحملوا نتيجة قراراتهم.
