فيفي عبده: أنا كل يوم في غم وأعصابي تعبت.. محتاجة دكتور نفسي
أعربت الفنانة فيقي عبده، عن حزنها الشديد بسبب ما يشهده الوسط الفني من وفيات، وما يشهده قطاع غزة في فلسطين، من ضحايا ووقوع مئات شهداء يوميًا إثر حربهم مع العدو المحتل الإسرائيلي.
وقالت فيفي عبده في تصريحات تليفزيونية، إن طبيبها الخاص نصحها بزيارة طبيب نفسي، قائلة: كنت بأدي واجب ربنا ميكتبهاش على حد، وإحنا كل يوم بنأدي في واجبات وأهل بنتي فلسطينيين وكل يوم أنا في غم لدرجة إن الدكتور قال يودوني عند دكتور نفسي، من كتر ما أعصابي تعبت، مش عارفة أعمل حاجة مفيش في إيدي ولا إيد حد حاجة عمالين ندعي وده مش كفاية، وأطفال متقطعة وحاجات عمرنا ما شوفناها.
وتابعت فيفي عبده معلقة على تصريحاتها في عزاء المنتجة ناهد فريد شوقي، قائلة: الناس فهمتني غلط، وفي مرحلة غزة واللي حاصل فيها أنا كل أهل بيتي من غزة فأنا عندي ظروف خاصة وقولت اللفظ ده علشانها، وأنا زي أي مواطن بحب بلدي وبموت في ترابها.
أما عن سبب غيابها عن الموسم الرمضاني المقبل، فعلقت فيفي عبده: أنا اشتغلت كتير أوي ولازم يجيلي حاجة أكون مبسوطة منها أوي علشان أعملها بعد الأعمال اللي عملتها، أنا عملت 25 مسلسلا و18 فيلما وكام مسرحية، ودلوقتي كويس الدراما بقت صغيرة.
فيفي عبده في عزاء ناهد فريد شوقي
ومن ناحية أخرى، كانت الفنانة فيفي عبده، أثارت الجدل بعد تصريحاتها حول الموت، على مواقع التواصل الاجتماعي، حيث قالت فيفي خلال حضورها عزاء المنتجة ناهد فريد شوقي: والله ما عندي حاجة أقولها غير إن أيامنا سودة ومهببة بستين نيلة، نشوفكم بكرة إن شاء الله في عزاء تاني.
