خالد النبوي: اللي بتدي الأمل النهاردة الأم الفلسطينية.. وبستغرب من حجم الوحشية واللا إنسانية اللي حاصل
أعرب الفنان خالد النبوي، عن إعجابه بوعي الشباب والجيل الجديد عن القضية الفلسطينية، بجانب حديثه عن تفاصيل إلقائه خطبة باللغة الروسية في فيلم الديلر.
وقال خالد النبوي، خلال لقائه مع الإعلامي محمود سعد في برنامج sold out: الجيل الجديد مبهر في الحياة، وده عظمته جاية من عظمة الأهل اللي ربوا ولادهم بالطريقة دي، النهاردة بنشوف أولاد عندهم 14 سنة بيتابعوا ما يحدث في غزة، سنهم صغير بس شوف بيكتبوا إيه.
وتابع خالد النبوي: ده أمل عظيم بيخلي العدو دايمًا غيران منك، هو ده نقطة قوتك، واللي بيدي الأمل النهاردة الأم الفلسطينية وتستغرب أوي من حجم الوحشية، مش معقول حجم اللاإنسانية اللي حاصل.
خالد النبوي: درست في المركز الثقافي الروسي 3 شهور علشان فيلم الديلر
وكشف الفنان خالد النبوي، تفاصيل إلقائه خطبة باللغة الروسية في فيلم الديلر، قائلًا: في فيلم الديلر عملت خطبة بالروسي، والفكرة إنك رايح تتعلم وعايز تعمل فكرة تدهش الناس، والمؤلف عارف إني مبفهمش اللغة الروسية وكان كاتب مشهد واحد مونتاج، وأنا روحت لصديقي حبيبي مدحت العدل راجل بسيط ومتواضع ومش متكبر، قولت له ده أكبر مشهد في الفيلم الخطبة دي إزاي نبهر الناس؟ وأنا هذاكرها بغض النظر إيه هي البلد فماتكتب ونشتغل، قالي عظيم.
وأضاف خالد النبوي: فاضل المنتج هندخل على الأستاذ سامي العدل وقولنا خلاص هو مش هيعمل المشهد ده بسبب أنه محتاج تكلفة كبيرة وشاشات ومجاميع كبيرة ومش هيتصور على يوم واحد، فقالنا طب إيه رأيكم إني هعمل لكم اللي أنتم عايزينه بس تبقوا تعرفوا تعملوا المشهد.
واستكمل خالد النبوي: قعد أذاكر 3 شهور وروحت المركز الثقافي الروسي، وهنا أنت مش شايف خالد النبوي أنت شايف شخصية علي الحلواني، لأن أنت شايف اللي قبلك زي الأستاذ محمود المليجي وفؤاد المهندس ونجيب الريحاني وأحمد زكي وسعاد حسني وفاتن حمامة، فعارف إني لازم أعد على الأرض أسكت واتعلم.
