طليق البلوجر هدير عاطف في التحقيقات: مكانتش تعرف حاجة عن شغلي| خاص
يواصل القاهرة 24 نشر التحقيقات في قضية البلوجر هدير عاطف بعد القبض عليها وحبسها على ذمة التحقيقات منذ عام وحتى الآن، لاتهامها بالاستيلاء على أموال مواطنين والنصب عليهم بزعم استثمارها لتحقيق عوائد وأرباح مالية، بعد ترويجها عبر صفحتها الشخصية لجذب ضحاياها وتحصلت على أموالهم، وأوهمتهم بأرباح مالية نتيجة استثمار تلك الأموال في تجارة السيارات والعقارات، علاوة على تشغيلها في البورصة، بالاشتراك مع زوجها بلال، وشقيقه وزوجة شقيقه.
تحقيقات قضية البلوجر هدير عاطف
ويستكمل القاهرة 24 نشر أقوال المتهم بلال طليق البلوجر هدير عاطف إذ قال:
أنا اللي كنت بتفق مع العملاء، ولو أنا مش موجود تامر وهاجر هم اللي بيتفقوا معاهم، ومضمون الاتفاق بيبقى عن تحديد المبلغ ونسبة الأرباح ومدة الاستثمار، وبيتم تحرير عقد شراكة بيني وبين العملاء، والعملاء كانوا على علم بطبيعة الأنشطة التي بيتم الاستثمار فيها، وأنا كنت مفهمهم إن الاستثمار في البورصة، وأنا كنت بكتب كل حاجة في الإعلان وبنزل أرباحهم وأرباحي، بكن أنا ما أسستش كيان قانوني يخول لي ممارسة النشاط، وأنا أخدت الفلوس من العملاء لاستثمارها في البورصة، عن طريق تطبيق كاش أو نقدي ومرة كان على الحساب البنكي الخاص بهدير عاطف مراتي.
وأضاف بلال طليق البلوجر هدير عاطف: أنا تلقيت من 8-9 مليون جنيه، وبيانات الحساب البنكي الخاص بـ هدير عاطف المستخدم في تلقى الأموال من العملاء، هو حساب أحد البنوك ومش متذكره، وبعد ما باخد الفلوس بيتم تشغيلها والحصول منها على أرباح وإرسال الأرباح للعملاء، وناس كثيرة حصلت على أرباح وناس استردت أصولها بالأرباح بتاعتها، والعملاء كانوا بيدونى الفلوس وأنا كنت بديهم الأرباح اللي كانت بيتم الاتفاق عليها، وأنا بس اللي كنت بدير الأموال دى وبستثمرها، لكن هاجر أختى وتامر جوزها شغالين معايا بيستقبلوا المكالمات من العملاء ويفهموهم على الاستثمار ويحددوا المواعيد.
وتابع بلال طليق البلوجر هدير عاطف في التحقيقات: هاجر وتامر كانوا بيتفقوا مع العملاء لكن هدير ملهاش أى دور واحنا اطلقنا بسبب المشاكل اللي حصلت بسبب القصة دي، والعملاء كانوا على علم بطبيعة النشاط من حيث تلقى الأموال ودعوتهم لتوظيف أموالهم، بس هدير عاطف مكنتش عارفة أي حاجة، ودور هاجر وتامر إنهم كانوا عارفين كل حاجة وكانوا بيقابلوا العملاء لما أكون أنا مش موجود، وبياخدوا منهم الفلوس وبيدوهالي علشان أستثمرها، وهما كانوا بياخدوا فلوس من الناس لما أكون أنا مش موجود.
