خالد بيبو: الضغط على الحكام مش مقبول.. والمخرجون لسه مجريوش ورايا
تحدث خالد بيبو مدير الكرة بالفريق الأول بالنادي الأهلي عن بعض الأمور المهمة التي تخص الفريق الأول، والتي تهم جمهور المارد الأحمر.
تصريحات خالد بيبو
وقال خالد بيبو في تصريحات تليفزيونية: الاستعداد لبطولة السوبر بعد كأس العالم للأندية كان مهمًا؛ لأنك تلعب ضد مدارس مختلفة.
وواصل: سافرنا وخضنا تمرين واحد، ثم لعبنا المباراة، وكنا مجهزين أنفسنا على هذا السيناريو، وكان الجدول الخاص بالفريق مكتوب به أننا سنلعب في هذا التوقيت "ورا بعض"، وكنا نحتاج أن يكون هناك استشفاء، والجزء البدني والنفسي والخططي كان موجودًا وجاهز والمعسكر كله كان يعمل على كيف ستلعب ضد كل هذه المدارس في توقيت قصير.
وتابع بيبو: الحمدلله انا بشتغل وبجتهد وبعمل اللي عليا والباقي على ربنا.. ومحدش يقدر يضمن التوفيق أو المكسب والحاجة الوحيدة اللي أقدر أعملها هي بذل المجهود عشان تنجح بعد ما تاخد بالأسباب.
وأشار: دخلنا الموسم بفترة إعداد دون لاعبي المنتخب والدوليين وتم تحديد توقيت السوبر الإفريقي في وقت صعب.. وفيمباراة اتحادالعاصمة لعبنا الشوط الأول وكنا قادرين على الفوز لكن لم يحضر توفيق والبداية كانت صعبة بهزيمة البطولة وكان هناك ضغطًا كبيرًا.
وأردف خالد بيبو خلال تصريحاته: كل الإنتقادات التي وُجّهت لي كانت كلام من غير أدلة فقد قيل مثلًا أنني فقدت السيطرة على اللاعبين "وأنا معرفش جابو الكلام دا منين".
وشدّد: لعبت في الأهلي وحصلت على بطولات في فترة ماضية.. "فهل دلوقت يبقا وشي وحش على الفريق يعني وأنا في النادي من زمان".
بيبو: الضغط على الحكام مش مقبول
وواصل خالد بيبو تصريحاته قائلًا: الضغط على الحكام مش مقبول بالنسبة لي.. سيد عبد الحفيظ كان بيضغط عشان ياخد حق الفريق وانا بقوم وبتحرك وبتكلم بس لسة المخرجين "مجريوش" ورايا، الفكرة كلها أن في خط للمدير الفني لأن المدير الفني لازم ياخد حريته في الحركة ومش بشوف أن مثلا حد يقوم مع المدير الفني على الخط في أي فريق في العالم، ولو أنا حسيت إن الفريق مظلوم هقوم واتكلم بكل تأكيد وادافع عن الفريق لأن دا شغلي إني أدافع عن الفريق واللاعبين والمدرب.
وأشار: مباراة سيراميكا قمت خمس ست مرات وتحدثت مع محمود البنا وقلت له "لازم تقول للحكم ان في ضرب قوي على اللاعبين".
وعن استخدام اللاعبين للسوشيال ميديا، تحدث بيبو وقال: من الطبيعي أن يستخدم اللاعب السوشيال ميديا.. واللعيبة لازم تفهم ان أي حاجة بتحطها بيحط نفسه في أه أو لأ.
وتابع: لازم يتم اختيار التوقيت، وأي حاجة خاصة بالفريق مرفوضة تمامًا.. وبنتعامل معاه من غير ما نعلن.
وعن الجلسة التي حدثت، قال بيبو: جلسة الرئيس مع كولر مش طارئة.. وطبيعي أن لجنة التخطيط ورئيس النادي يعرفوا احتياجاتنا وكل حاجة خاصة بينا وإحنا مش بعيد عن لجنة التخطيط وفيه متابعة لكل الأحداث.
وواصل: الأهلي منافساته كتير وأي حاجة بيحتاجها الجهاز الفني فالإدارة بتنفذها.. وبنتكلمفي الغرف المغلقة ولما بيحصل حاجة بنعلنها.
وعن تألق موديست، تحدث خالد بيبو: موديست بيأدي ومفيش أي كلام لرحيله في يناير؛ لأن عنده عقد ساري "ومعرفش الكلام دا طلع منين".. ولو هناك جديد سنقول.. أما عن صلاح محسن فكان متواجد في المعسكر الأخير ولم يكن له نصيب المشاركة، واللاعب جاهز ف أي وقت ومفيش جديد حصل حتى هذه اللحظة.
وتطرق بيبو للحديث عن قائمة منتخب مصر: الإختيارات من حق فيتوريا وهو مسؤول عن اختياراته وهيتحاسب في الآخر.. لكن كان هناك لاعبين تستحق التواجد مثل ياسر إبراهيم، ورامي ربيعة، وحسين الشحات.. لكن أتمنى التوفيق للمنتخب وإن شاء الله نحقق البطولة.
واختتم تصريحاته موجهًا رسالة إلى جمهور المارد الأحمر: مهما أطلع اللي جوايا مش هوفي حق جمهور الأهلي اللي أكبر من أي كلام ودائما سندنا وساعدنا ولابد أن يحمي اللاعبين والنادي من أي شخص يريد هدم النادي.. والناس بعد كدة تتعامل مع الأخبار أنها تفكر قبل ما تنقل الخبر وبص على لبس تاو وموديست "لبس خروج مش معسكر"، هناك لاعبين أخذوا إجازة بعد المباراة.. "وأكيد الأهلي مش هيسيب وينسى اتنين لعيبة".
