مروان موسى يُحيي ذكرى ميلاد والدته: قعدتي معاكي علمتني الإنسانية والرجولة
أحيا مطرب الراب مروان موسى، ذكرى ميلاد والدته الراحلة، معربًا عن حزنه الشديد لفقدانها واشتياقه لها، كاشفًا تفاصيل مرضها منذ عام 2017.
ونشر مروان موسى، مجموعة من الصور التي جمعته بوالدته عبر حسابه الشخصي بموقع تبادل الصور والفيديوهات انستجرام، وكتب: كل سنة وأنتي طيبة يا أمي ربنا يرحمك، مش بعرف أكتب البوستات الطويلة المعبرة دي بس حاسس إني لازم أعمل دا دلوقتي، عمري ما هنسى يوم ما جدي كلمني وقالي إن جالك مرض خطير في يناير 2017، ودا كان بعد 6 شهور من بدايتي في المزيكا، عشان كدا بداية كاريري في الغناء وبداية إنك تتعبي حاجتين جم حياتي تقريبًا في نفس الوقت.
وتابع مروان موسى: ندمان أن سني الصغير وقتها حسسني إني متعطل وأنا براعيكي في البيت، كنت شايف كل شباب جيلي بينزلو وبيتحركوا إلا أنا، روح التحدي في الراب خليتني متضايق إني مش عارف أعمل أغاني أكتر أو أنزل أصور كليبات وأخلي كاريري يتقدم، لو كنت عارف اللي أعرفه دلوقتي كنت استمتعت بكل لحظة معاكي أكتر، بدل الحتة الطموحة اللي جوايا اللي كانت بس مركزة على النجاح وإني أعيش شبابي زي بقيت الناس اللي في سني.
وأضاف مروان موسى: بس الحمد لله إني بعد شهور قليلة فهمت أن اللي أنا بعمله معاكي أهم وأفيد وأجمل من أي خروجه وأي نجاح ممكن احققه في الحياة وبقيت بحطك أولوية قبل أي حاجة، قعدتي معاكي علمتني الإنسانية والمسئولية والرجولة، ودي كانت حاجات مش كتير من اللي قدي في السن كانوا بيتضطروا يمروا بيها، لغاية النهاردة عمري ما نزلت أغنية من غير ما اسمعّهالك الأول، كنت باجي أسمعك أول ما التراك يخلص وكان لازم تقوليلي حلوة أو وحشة بصراحة تامة بعد ما اترجملك الليريكس بالألماني بار بار عشان تفهمي اللي أنا بقوله بوضوح.
واستكمل: رغم كل دا أغنية البوصلة ضاعت هي تقريبًا الأغنية الوحيدة اللي كتبتها عنك، وكان بار عمر طويل بس في ثانية خانك، لو رجعت بينا زي ما كانت، من البارات النادرة اللي بكلمك فيها بصيغة مباشرة في كل مزيكتي، عشان كده لما كنتي قاعدة في مسرح الزمالك يومها في الجمهور وكنت بشاورلك ما قدرتش أداري البكاء لما قولت السطرين دول وأنا بشاورلك، عشان كده كنت دايمًا بتفادي التوبيك دا في أغانيا لأني كنت أصلًا بهرب من الواقع اللي إحنا عايشينه في البيت بالأغاني اللي بعملها، والأغاني الحزينة اللي شبه دي كانت بتغمق عليا الواقع بزيادة.
وأردف: من صعوبة التوازن بين رعايتك والشغل قررت في بداية 2020 أني أبطل غناء عشان أركز بس على القعدة معاكي والرعاية التامة لحالتك الصحية، وأنتي ساعتها قولتيلي ما عملش كده لأني قدرت أوزنها كويس وإنك بتفرحي بيا لما بنجح في شغلي، ومع مرور الزمن بقيت بستغرب إزاي كل ما كنت بختارك أولوية على نجاحي في شغلي، كان ربنا بيكرمني فيه أكثر وأكثر، قبل وفاتك باسبوعين وصلوا 3 جوايز اللي كسبتهم في الـ AFRIMA ورغم أن كانت حالتك أصعب شوفت فرحتك بيا وبينا إحنا الاتنين أننا قدرنا نحقق النجاح زي دا رغم العواقب أتأكدت إن ربنا كرمني بسببك وبسبب أنك راضية عني.
واختتم مروان موسى: ربنا يرحمك يا أحلى وأجمل حاجة في حياتي، أنا عارف أنك هتفضلي دائمًا متابعاني وشايفاني وأنتي أكيد عارفة إن مش بيعدي يوم مش بفتكرك وبدعيلك فيه.
