سمسم شهاب: المتمسكون بمبادئهم بيعانوا.. وخفت ولادي يتعايروا بأبوهم | فيديو
كشف الفنان سمسم شهاب، عن سبب عدم مواكبته لـ الألوان الغنائية التي ظهرت خلال الأعوام القليلة الماضية.
وقال سمسم شهاب خلال ندوته بالقاهرة 24: فيه ناس واكبت الخلل الفني، وأنا مسمحتش لنفسي إني أعمله، أقعد في البيت بـ احترامي وولادي يحترموني، وبعدين في النهاية الرازق هو واحد، وأخد رزقي بـ احترام، ربنا بيحب العبد عزيز النفس مش الذليل، ليه أكسر نفسي وأكسر ولادي؟، ولادي مش صغيرين علشان يتكسروا قدام حد أو حد يعايرهم بـ أبوهم، لأ أنا عايزهم يتباهوا بـ أبوهم ويكون بيقدم كلمة كويسة.
وأضاف سمسم شهاب: أنا اتعرض عليا أعمال تجارية كتير جدًا، والمنتج أحمد السبكي أنا بحبه جدًا، واشتغلت معاه فيلم اسمه عش البلبل وقدمت أغنية اسمها لقمة العيش، والحاج أحمد حرصًا عليا كان عايزني أعمل لون قريب من زملائي، قولت له مش هينفع، أنا بطاقتي لما بدخل أي مصلحة حكومية بطلعها مكتوب فيها أسامة جابر الشهير بـ سمسم شهاب مش هينفع أبقى غيره، أنا هشتغل على كده ورزقي على ربنا.
وأكمل سمسم شهاب: مبعتبرش الخسارة المادية خسارة، في حاجات أهم من الفلوس، والفلوس بتيجي بعزة نفس، لو دورنا في كل المجالات هنلاقي أن أي حد متمسك بـ مبادئه بيعاني بس معروف أنه محترم مهما حاولوا يحطوا عليه تراب.
