عنبة: في حد قالي إنت مش قدوة زي مايان السيد.. واسمي مش عيب عشان أغيره
تحدث الفنان عنبة عن تفاصيل مشاركته في فيلم عصابة عظيمة مع الفنانة إسعاد يونس، والذي يعرض حاليًا بدور العرض السينمائي، إلى جانب حديثه عن الانتقادات والإحباطات التي تعرض لها في البداية.
وقال عنبة خلال استضافته وتكريمه في موقع القاهرة 24: تجربة مشاركتي في فيلم عصابة عظيمة هايلة، وسعدت بالتعاون مع إسعاد يونس صاحبة السعادة، يعني الضحك والهزار والروح الحلوة والشباب والطاقة، وهي عسل ما بتحسسكش إن فيه فرق في السن ولا في فرق في تفكير الأجيال.
وأضاف عنبة: لما عرض عليا الورق وقلت لأمي قالت لي أمضي على طول، وما كنتش مصدومة زي أول عمل لما قلت لها هشارك يسرا في مسلسل 100 ألف حمد لله على السلامة.
وأشار عنبة إلى أن مشاهد الأكشن في العمل لم تكن صعبة عليه معتبرًا أن الصعوبة في مشاهد الكوميديا، موضحًا: الضحك أصعب من أي حاجة تانية لإن المصريين كلهم دمهم خفيف، وإنك تضحك حد مصري زيك دي مصيبة، وأنا ماكنتش مركز أكون كوميدي على قد ما أكون لذيذ وفيا قبول.
وأضاف عنبة مازحًا: بعض مشاهد الأكشن كانت صعب لإني اضربت كتير، وكان نفسي أكون بضرب مش بتضرب.
وعبر عنبة عن سعادته بتهنئة يسرا له، مشيرًا إلى أنها تواصلت معه وباركت له على مشاركته في عصابة عظيمة قائلًا: يسرا لسه مكلماني، قالت لي مبروك يا حبيبي وأنا قلت لك أنا مستبشرة ليك خير، وأنا باركت لها على الأعمال الجديدة وقلت لها إنتي إضافة لأي حد لحد.
وعن الشخص الذي كان يقف بجانبه دائمًا ويدعمه قال: اللي كان دايمًا بيدي لي طاقة أمي، ولما كنت أقول لها نفسي في حاجة تدعي لي مش بتحبطني وأهلي كلهم وقفوا بجانبي.
عنبة يكشف سبب بكائه في العرض الخاص لفيلم عصابة عظيمة
كما تطرق عنبة للحديث عن سبب بكائه خلال العرض الخاص بالفيلم، قائلًا: ربنا يكتب لأي حد إحساس أن إهله يشوفوا نجاحه وهما بجانبه، وأنا كل حاجة بتعب فيها مش علشاني ولكن علشان خاطر أهلي والناس اللي بتحبني.
عنبة: عمري ما فكرت أغير اسمي لأنه مش عيب
وكشف عنبة أنه تعرض لبعض الإحباطات في حياته قائلًا: في ناس بتفهم إن علشان اسمي عنبة فأنا بعيد عن الطموح والنجاح، مع اني اسمي مصطفى بس عنبة ده اسم الشهرة، وأنا من منطقة شعبية محدش بيتنده باسمه، وده مالوش علاقة بالنجاح، وعمري ما فكرت أغير اسمي لأنه مش عيب ولا شتيمة.
وعن الانتقاد التي تعرض لها بعد نشر فيديو له مع مايان السيد: أنا مش بحبط بسهولة، ومرة حد بيمثل والله ما أعرفه وربنا يكرمه وبقول له على نياتكم ترزقون، وأنا مش باخد مكان حد ولكن عاوز أكون نفسي، كتب كومنت وقال مايان تمام ممثلة شاطرة ولكن عنبة مش قدوة وأغانيه بتحرض الناس على العنف، لكن بالعكس أنا كل أغانيا بتدي للناس أمل وطموح، وبقول فيها أنا جامد وهكمل وهقدر على اللي جاي.
وأكد عنبة أنه يهدف من خلال أغنياته إلى توصيل رسالة لأي شخص يريد أن يحبط غيره، قائلًا: بوصلها لأي حد بيحاول يحبط أي حد مش شخص معين، وأنا تخطيت المرحلة دي وبقيت فاهم وبحترم أي كومنت.
وأكمل عنبة: حب الناس أحسن حاجة في الدنيا هو اللي بيخلني أشتغل وأكمل، وكل همي الناس تشاركني الفرحة، وفي ناس بتحبني بجد من قلبها ويكفيني إن حد يدخل يقولي إن ابنه أربع سنين وسنة ونص بيحبني وبيقلد حركاتي.
