محمد نجاتي: أنا مدرستش تمثيل.. والفن عمره ما كان بالدراسة
أشاد الفنان محمد نجاتي، بصناع فيلم الحريفة الذي يعرض حاليًا بدور العرض السينمائي بطولة الفنان نور النبوي في أول بطولة سينمائية له، وبمشاركة مجموعة من الفنانين الشباب ومنهم: أحمد غزي، نور إيهاب، خالد الذهبي، وكزبرة في أول تجربة تمثيل له وغيرهم.
وقال محمد نجاتي في تصريحات لـ القاهرة 24 مشيدًا بمطرب المهرجانات كزبرة والممثل أحمد غزي: الفيلم أبهرني، وكزبرة على درجة عالية من الكفاءة، وعاجبني جدًا وفاجئني وعنده تلقائية، ودي حاجة بيوصلها الممثل بعد فترة من الشغل، فمش سهل يكون عنده الإمكانيات دي في أول عمل له، ولازم يركز في موضوع التمثيل وهيكون ممثل مهم أوي في، ولفت نظري غزي وهيكون نجم في يوم.
وعن انتقاد ظهور مطربي المهرجانات في التمثيل قال: مالهاش علاقة في حاجة اسمها هو ممثل واتقن دوره وهيكون مفيد في الشغلانة جدا، وعمر التمثيل ما كان بالدراسة، وأنا ما درستش تمثيل، والتمثيل موهبة وأي حد ممكن يكون عنده موهبة والمهنة تستفيد منه، وكون أنه مطرب مهرجان أو مغني شعبي مش عيب، وشفنا مطربين شعبيين كتير نجحوا وحققوا إضافة للتمثيل.
وأضاف: المخرج مهمته اختيار الممثلين وأنه يختار وجه جديد سواء محاسب أو دكتور بما يفيد الدور ده شيء جيد، وأكيد بالرجوع للنقابة، وبالنسبة لي معنديش مشكلة لو حد عنده موهبة أيا كان هو إيه، إلا لو مقدرش يؤدي الدور على أكمل وجه.
كما أشاد محمد نجاتي بموهبة الفنان نور النبوي قائلًا: نور النبوي ابن الوز عوام وأدى الدور بشكل مبهر، وشعرت إني بتكلم عن فيلم ثقيل كأن ليهم سنين في الشغلانة وبحيي الإنتاج طارق الجنايني على اختياره للفيلم لأن التجربة فيها مخاطرة كبيرة، لكن هو اختار صح والفيلم محقق إيرادات عالية جدًا، والمخرج رؤوف السيد عامل صورة هائلة واختار شكل للفيلم أجنبي وخواجة على الآخر.
