رجل أعمال التجمع الخامس المتهم بإطلاق النار على طليقته: ولادي واقفين معاها وعايزين يحبسوني
يواصل القاهرة 24 نشر نص التحقيقات في قضية اتهام رجل أعمال التجمع الخامس، بإطلاق النيران على طليقته، والشروع في قتلها وإصابتها بطلقة نارية بمنطقة الرقبة، وكذلك الشروع بقتل نجله وإطلاق عيارين ناريين عليه، لكنه لم يصبه.
قصة رجل أعمال التجمع الخامس
تبين من التحريات أن الشخص الظاهر في الفيديو هو رجل أعمال ومدير شركة بترول يدعى إسماعيل. ع، يبلغ من العمر 64 سنة، وأن مصور الفيديو هو نجله ويدعى عمر في العقد الثالث من العمر، وأن السيدة المصابة هي طليقته، وتم إلقاء القبض عليه واقتياده إلى قسم الشرطة، وتقرر حبسه على ذمة التحقيقات ثم إحالته إلى المحاكمة الجنائية.
أقوال رجل أعمال التجمع الخامس في التحقيقات
وقال رجل أعمال التجمع الخامس في التحقيقات: أيوة إحنا في تنازع بينا على البيت، تحديدا كان في شهر 10/2022، والبيت ده موجود في عمارات التطوير، وسبب النزاع عشان احنا كنا لسة متزوجين وهي كانت عايزة تقعد في البيت، وانا مش فاكر أذا كان فيه محاضر بينا بسبب المشكلة دي ولا لا، بس كان فيه محضر صدر قرار فيه من المستشار المحامي العام لشئون الأسرة، يوم 1/1/ 2023 واتحكم فيه بـ التمكين بالمنصفة بيني وبينها وفعلا تم تنفيذ القرار.
وأضاف رجل أعمال التجمع الخامس في التحقيقات: أن العلاقة بينا كانت كلها مشاكل وزادت المشاكل بعد تنفيذ القرار، وبعد تنفيذ القرار بيومين، المشاكل تطورت لحد ما وصلت إنها كسرت حاجات في الشقة عندي وضربوني هي وأولادي، فحررت محضر باللي حصل، والمحضر كان برقم 1717 لسنة 2023 التجمع الخامس، وبعدها تم الحكم فيه وتم تغريمي وتغريم ابني محمد ب 200 جنيه، وانتهت الخلافات بينا بالطلاق، وده كل اللي فاكره في الخلافات اللي بينا.
وأكمل رجل أعمال التجمع الخامس في التحقيقات: وبعدها جت سكنت في الشقة اللي جنبي على طول، وإحنا كنا مبنتكلمش مع بعض، حتى الأولاد كانت العلاقة بينا زي الزفت وهما انحازو لمامتهم بعد المشاكل دي وبقوا عايزين يحبسوني، وحصل بينا مشاكل فحررت محضر السرقة اللي أنا عملته في طليقتي وقلت عليه كنت عمله بردو في عمر ابنى ومحضر اللي كنت عمله في محمد وعمر وطليقتي، وهما كانوا متهميني بنفس المحضر وهما أولادي وطلقيتي عاملين فيا المحضر بتاع التزوير اللي في السويس.
وبسؤاله عن مكان تواجده قبل القبض عليه قال: كنت باكل في مطعم مش فاكر اسمه في البنزينة اللي بعد أربيلا بلازا اتجاه فاطمة الشربتلي، وكنت لوحدي، وأكيد البنزينة كلها كاميرات، أنا كنت لابس نفس البنطلون وقميص أزرق، والسندوتش مكنش شبعني فطلعت كلت في مطعم اسمه الحاتي وبعد كده روحت الكافيه، أنا دخلت طلبت سندوتش وخدته كلته في العربية في حوالي من 7 إلى 10 دقائق، وبعد كده اتقبض عليا.
