جمال حجازي: جالي فيروس C ومكنش معايا فلوس العلاج.. وقاعد في شقة إيجار ومش سايب حاجة لبناتي
كشف الفنان جمال حجازي، تفاصيل إصابته بمرض فيروس C وعلاجه على نفقة الدولة، مؤكدًا أن تجربة المرض من أصعب التجارب التي مر بها.
وقال جمال حجازي في تصريحات تليفزيونية مع الفنانة نشوى مصطفى: كان في فترة أنا كنت فيها دي شغلتي وعندي 3 بنات في مدارس خاصة فكان لازم أشتغل، ومكنش عندي رفاهية إني أقول لأ وكنت بقبل بأي دور، وجيت في فترة عانيت من فيروس C الدرجة الرابعة والأخيرة، والدكتور كان نائب وزير الصحة متابع حالتي وقالي أنت F4 والعلاج مش موجود في مصر ومكنتش أنا لوحدي كان في 3 نجوم مصابين.
وأردف جمال حجازي: العلاج كان بـ 4 مليون فأنا مكنش معايا فلوس والحكاية بالنسبة ليا كانت شاشة سوداء أمام عيني، أنا عندي 3 بنات ومكنتش عامل أي حاجة في حياتي خالص ولا سايب لهم حاجة، وقاعد في شقة إيجار فكانت فترة صعبة جدًا عليا، وسبحان الله والله أكبر الدكتور قالي أنت ربنا بيحبك والعلاج اتوافق عليه وفي خلال أسبوع هتاخد الجرعة بس أنت أول ممثل هياخد العلاج هنصورك، قولتله لأ ورفضت.
وأضاف: خدت العلاج على نفقة الدولة ومدفعتش ولا جنيه، ومتصورتش ولا حاجة علشان ولادي، واتعالجت الحمد لله وبشكر سيادة الرئيس أنه دخل العلاج لمصر.
آخر أعمال جمال حجازي
وشارك الفنان جمال حجازي، في مسلسل جعفر العمدة، بطولة الفنان محمد رمضان، والذي عُرض في الموسم الرمضاني الماضي 2023، وحقق نجاحًا كبيرًا على مستوى الوطن العربي.
