بسبب 300 جنيه.. ننشر أقوال المتهم بالتخلص من صديقه في الزيتون
كشفت التحقيقات في القضية رقم 5434 لسنة 2023، المتهم فيها شخص بقتل زميله في مشاجرة، أنها نشبت بينهما بسبب 300 جنيه.
ننشر أقوال المتهم بالتخلص من زميله في الزيتون
وحصل القاهرة 24 على نص التحقيقات، حيث جاء في أقوال المتهم: أنا كنت واقف مع أصحابي عند البيت ولقيت المجني عليه جه وقالي هات الـ 300 جنيه اللي عليك، وقلتله أنت ملكش عندي حاجة أنا كنت شاري منك بطارية ودفعت فلوسها، وكان باقي 130 جنيه وأنت قلتلي أنا مسامحك فيهم، ولكن ملكش عندي جنيه ولا حاجة، قالي خلاص براحتك بس أنا هعدي عليك بالليل وهاخد الفلوس بمعرفتي، ومشي وبعدين أنا كملت اليوم عادي، وأنا في البيت على بعد المغرب كدا لقيت المجني عليه جالي تحت البيت ونده عليا، خرجتله من البلكونه قالي يلا انزل عاوزك قلتله شوية كدا قالي طيب أنا مستنيك الشوية دول تحت البيت.
وتابع المتهم خلال أقواله: لما لقيته فضل قاعد تحت البيت نزلتله وقولتله تعالى ومشينا بعيد عن البيت وطلعنا على الناصية، فأنا قلتله أنت بتتكلم على إيه، أنت ملكش عندي حاجة، قالي إزاي وراح ضربني بالقلم على عيني، وكان ماسك حاجة في إيده أنا مش شايفها واتعورت في حاجبي ومسكنا في بعض وشدني من رجلي ووقعني على الأرض، وشدني في نص الشارع من رجلي وفضل يضرب فيا في وشي، رحت حشته من عليا وقومت وقفت ولقيته فتح مطوة في إيده وضربني في رقبتي، ولقيته ضربني تاني بالمطوة في عيني الشمال، حسيت بنافورة دم على وشي ومشفتش حاجة خالص رحت ماسح الدم من على وشي، وحاولت آخد المطوة منه وأخذتها وبدأت أضرب فيه وانا مش شايف من الدم اللي على وشي.
وأكمل المتهم: وأول لما فتحت عيوني لقيت المجني عليه بيجري ورا عربية رحت جاري وراه ولقيت حديدة على الأرض روحت خبطة بيها على إيده، رجعت الناس شدتني وبيقولولي عيونك راحت اجري على المستشفى واخدوني ورحت مستشفى الدمرداش، وعرفت إن عيني الشمال باظت خالص، وعرفت إن هو مات وجه قسم الزيتون وأخدوني على القسم وجيت على هنا وده كل اللي حصل.
