المحامي حمدي خليفة: هلغي المشروع العلاجي وهبني 20 مستشفى بتكلفة متزدش عن 800 مليون جنيه
حل حمدي خليفة المحامي بالنقض ونقيب المحامين السابق والمرشح على مقعد نقيب المحاميين، ضيفًا على الإعلامي هيثم بسام، في برنامجه ورقة في ملف، للحديث عن تفاصيل برنامجه الانتخابي.
وقال حمدي خليفة، عن ترشحه لمقعد نقيب المحامين: الانتخابات مبتقفش عند حد معين، والمسألة كلها بتدور حول إرادة الجمعية العمومية وعدد الناخبين، فأيّما كان العدد المرشح ليس قاسما مشتركا في أصوات المحامين، واللي منتظرينه من الجمعية العمومية التعبير عن رغبتها.
أما عن برنامجه الانتخابي، فقال حمدي خليفة: البرنامج الانتخابي بالنسبة لي مبيقفش عند حد معين، يعني أنا دائمًا ممكن كل فترة زمنية أحدث برنامجي الانتخابي، وأنا كان عندي برنامج انتخابي سنة 2009 نفذت جزء كبير منه وبقيته متنفذش لأنه صدر حكم بعدم دستورية القانون فالدورة مكتملتش.
وتابع: وكان من أهم النقاط في البرنامج الانتخابي اللي نفذته في 2009 إني حصلت على قطع أراضي على مستوى مصر كلها، عبارة عن 20 قطعة أرض عبارة عن مدن سكنية وأندية رياضية، كنت واخد المتر في المدن السكنية بـ 70 جنيها وفي الأندية الرياضية بـ 1 واحد للمتر، وقبل 2009 كنت عامل مدينة سكينة ونادي رياضي واجتماعي كبير.
وأكد حمدي خليفة، أنه سيتم بناء 20 مستشفى في برنامجه الانتخابي، قائلًا: في 2009 كنت حريص على تخصيص الأراضي لأني مكنتش معتبر أنها مدن سكنية وأندية رياضية، بل كنت واضع في الاعتبار إن كل قطعة أرض هبني عليها مستشفى، يعني 20 مستشفى على مستوى المحافظات بالكامل، طبعًا مكنتش هقدر أدير كل هذه المستشفيات وكنت هستعين بأحد الشركات اللي بتدير المستشفيات وحق الانتفاع اللي باخده من الشركة دي كان مقابل علاج المحاميين مجانًا، يبقى أنا وفرت للمحامي وأسرته العلاج مجانًا ووفرت دعم سنوي للعلاج المفروض بيتم سداده من النقابة العامة بـ 800 مليون جنيه سنويًا.
وأضاف: الـ 800 مليون جنيه المفروض أوظفهم بأني أزود بيهم المعاشات ومش هزود بالمبلغ ده لوحده، لأن عندي برضوا مسألة وحسبة تانية، ووجدت إن مباني المستشفيات مش هتكلف دعم سنة واحدة، يعني مش هيتكلفوا 800 مليون جنيه، يعني أنا وفرت على المحامي أنه يدفع مبالغ للعلاج، ووفرت على النقابة أنها تدفع دعم سنوي بعد كده، يعني هو دعم سنة واحدة بس هاخده هبني بيه أبنية المستشفيات، والدعم في السنوات التالية هزود بيه المعاشات.
وأردف: يبقى أنا حليت مشكلة العلاج من جذورها، أنا مبعرفش العمل المسكن أو المؤقت أو أن أنا أقعد علشان أوقع على كارنيه أو علاج أو معاشات، كل الأمور دي أنا هسندها للنقابات الفرعية، بحيث إن النقابات الفرعية هيكون لها صلاحية النقابة العامة للعلاج والمعاشات والكارنيهات، والنقابة العامة أنا بوظفها للمشروعات الكبرى فقط لا غير، فلما نرجع لمشروع العلاج وأنا ابني 20 مستشفى السنة دي أو السنة اللي جاي أيًا كان الوقت اللي اتبنوا فيه أنا كده بحل مشكلة العلاج من جذورها، كده هنلغي المشروع العلاجي ولا النقابة هتدفع دعم ولا المحامي هيدفع مقابل علاج.
برنامج ورقة في ملف
الجدير بالذكر أن الإعلامي هيثم بسّام يقدم برنامج ورقة في ملف عبر شاشة قناة النهار، ويذاع البرنامج يوم الخميس من كل أسبوع في تمام الساعة الرابعة عصرًا.
