أورتيجا يهاجم عمرو مصطفى: شتمنا وقال علينا بنسرق وعايشين بالحرام.. وعنده أغاني مسروقة
أعرب مغني المهرجانات أورتيجا، عن استيائه الشديد بتصريحات المحن عمرو مصطفى، والذي أشار فيها أن مجال أغاني المهرجانات مبني على سرقة الألحان، الأمر الذي جعل الأول يرد على هذه التصريحات، ويؤكد أن الملحن أيضًا لديه أغاني مسروقة.
أورتيجا يفتح النار على عمرو مصطفى
وقال أورتيجا خلال ندوته بالقاهرة 24، إن الملحن عمرو مصطفى هاجم مطربي المهرجانات وسبهم واتهمهم بالسرقة، موضحًا: عمرو مصطفى شتمنا، بيقول إننا بنسرق، لا أنا ممكن أجبلك حاجة أنت واخدها من أماكن تانية مسروقة برضو، مفيش حد صايع على حد، وفي مطربين كبار جدا خدوا ألحان من ناس والناس دي بتبقى واخده الألحان دي من بره.
وأضاف أورتيجا: لما تيجي توجه كلام وجهه لشخص، إنما اللي اتقال إن مجالنا مبني على السرقة، وإننا عايشيين بالحرام عشان بنسرق مجهود الناس التانية لمجرد أن حد استخدم اللحن بتاعه، طب ما لحن أغنية ألعب يلا العالم كله غناها، أنا بفرح بده، لو اتسرقت وجه للشخص اللي سرقك، متجيش تقول إن كل الناس حرامية والمجال ده فيستك وكل اللي فيه بيسرقوا.
وأكد أورتيجا، أن أغلب الملحنين في الوسط الغنائي يقتبسون ألحانهم، معقبًا: الفنان عبارة عن إنه بيبني مشروع من وحيه، ولو في لحن عاجبني من حد بستأذنه، أو بنمشي قانوني وناخد اللحن، عشان ننفذ، وكل الملحنين بيقصوا من بعض وبياخدوا من بعض، الملحن فيه ذاكرة كبيرة من الألحان والمزيكا اللي بيسمعها، فلما يجي يعمل حاجة، بيطلع من اللي متحوش في الدماغ بس مش بتبقى مشابه.
أورتيجا يوضح حقيقة تورط مي كساب في انفصاله عن أوكا فنيًا
وعلى جانب آخر، أكد أورتيجا خلال ندوته بالقاهرة 24، أن الفنانة مي كساب، زوجة صديقه مطرب المهرجانات أوكا، ليس لها دخل في انفصاله الثنائي فنيًا، مشيرًا إلى أن كل ما يتردد في هذا الأمر مجرد شائعات وليس لها أساس من الصحة، معلقًا: أنا وأوكا انفصلنا عن بعض فنيًا أكتر من 9 مرات، بنروح وبنيجي، بس الناس مكنتش تعرف ده لأن مفيش سوشيال ميديا، والانفصال من غير مشاكل، كل الحكاية اختلاف وجهات النظر، هو عنده حاجات مبتجيش معايا، وأنا عندي حاجات مبتجيش معاه.
