التحقيقات الكاملة لقضية ميرهان حسين.. مجوهرات وسرقة والمحكمة تعاقب المتهمين
تعرضت الفنانة ميرهان حسين لواقعة سرقة مجوهراتها من داخل شقة تحت الإنشاء في منطقة المقطم، في القضية التي حملت رقم 2996 لسنة 2024 جنح المقطم، والمتهم فيها عدد من العمال خلال تشطيب شقة والد الفنانة ميرهان حسين.
سرقة الفنانة ميرهان حسين
وقال والد الفنانة ميرهان حسين أمام جهات التحقيقات: أنا اكتشفت سرقة المشغولات الذهبية من داخل الشقة خاصتي اليوم، والعمال دول شغالين عندي من حوالي 10 أيام بالقطعة رقم 7175 بالمقطم، وهما اللي سرقوا المشغولات الذهبية من داخل الشقة.
وأضاف والد ميرهان حسين: المسروقات عبارة عن 4 ساعات يد ذهبية وفضية اللون، و2 قلادة ذهبية بإحداهما عملة ذهبية اللون، و2 أسورة ذهبية اللون، وقلادة كبيرة الحجم ذهبية اللون وبداخلها الثانية، 8 خواتم ذهبية وفضية اللون، وزوج أقراط ذهبية اللون، وحقيبة قماشية بداخلها بعض المتعلقات الشخصية ومستحضرات التجميل.
وأما عن أقوال المتهم الأول في القضية فجاءت أمام جهات التحقيقات كالتالي: اسمي أحمد. ا. س. ع 25 سنة عامل ومقيم بالغربية، وأنكر معاونة آخر بسرقة المنقولات المملوكة للمجني عليه والد الفنانة ميرهان حسين.
وأضاف المتهم الأول أمام جهات التحقيقات: اللي حصل أني اشتغلت عند المهندس حسين في شقتين واحدة في الدور الأول والثانية في الدور الثاني علوي، وبعدين خلصت شغل، وكان معايا في الشغل محمد وبعدها خلصنا الشغل اللي كان مطلوب منا وطلبنا حسابنا والمهندس حسين كان سايبلنا حسابنا مع واحد جاره، ولما جاره ده حاسبني قالي أنت لك معايا 5 آلاف جنيه، قولتله تمام مفيش مشكلة هاخدهم وخلي المهندس حسين يجيلي باقي حسابي فودافون كاش ومفيش مشكلة.
وأكمل المتهم الأول أمام جهات التحقيقات: بعدها البشمهندس حسين كلمني قالي تعالى علشان تاخذ باقي حسابكن قولتله ماشي أنا جايلك، ولما وصلت مكان البيت بتاعه لقيت ناس واقفه ضربتني وشتمتني وقالتلي أن المهندس حسين يتهمني أنا واللي معايا بالسرقة، وبعدها أخدونا، ولما روحت القسم لقيت محمود هناك، وعملولنا محضر وجينا النهاردة.
وأدلى المتهم الثاني بأقواله أمام جهات التحقيقات في واقعة سرقة الفنانة ميرهان حسين قائلا: اسمي محمد. م، واللي حصل أن أنا والصبي بتاع أحمد اشتغلنا مع المهندس حسين في شقتين واحدة في الدور الأول والثانية في الدور الثاني علوي، وعملت شغل السيراميك اللي فيهم وكان معايا في الشغل أحمد، وبعدها خلصنا الشغل اللي كان مطلوب منا، وطلبنا حسابنا والمهندس حسين كان سايبلنا حسابنا مع واحد جاره، ولما جاره ده حاسب الأسطى أحمد وقاله أنت لك معايا 5 آلاف جنيه قاله تمام مفيش مشكلة.
وأضاف المتهم الثاني في واقعة سرقة مجوهرات الفنانة ميرهان حسين: قلت له خلي المهندس حسين يجيب لي باقي حسابي كاش ومفيش مشكلة، بس بعدها البشمهندس حسين كلم الأسطى وقاله تعالى علشان تاخد باقي حسابك، فالأسطى قاله ماشي أنا جايلك، ولما وصلنا مكان البيت بتاعه لقيت ناس واقفه ضربتني وشتمتني وقالت لي أن المهندس حسين يتهمني أنا والأسطى بالسرقة، وطلبوا النجدة وأخدونا على القسم ولما روحت القسم لقيت محمود هناك وعملوا لنا محضر وجينا النهاردة النيابة.
وتابع المتهم في واقعة سرقة مجوهرات الفنانة ميرهان حسين: لما فتشوني ملقوش معايا حاجة، ومعرفش الحاجة دي بتاعت مين، ومعرفش الحاجة دي محطوطة ليا ليه، وهو بيقول كده ليه، وأنا مسرقتش حاجة، وأنا أعرف أحمد عشان أنا شغال صبي معاه، ومحمود أنا معرفهوش.
يذكر أن محكمة جنح المقطم المنعقدة بمحكمة جنوب القاهرة بزينهم، قررت في قضية سرقة مجوهرات الفنانة ميرهان حسين، بحبس المتهم الأول سنة، وحبس المتهم الثاني 6 أشهر، وإحالة المتهم الثالث لمحكمة الأحداث.
