أبرز تصريحات فيفي عبده: الرقص زمان كان ليه هيبته وكسرت الدنيا بالجلابية.. وأنا أبوس أرض مصر
حلت الفنانة فيفي عبده، ضيفة على أحد البرامج الإذاعية، وتحدثت خلال اللقاء عن تفاصيل مشوارها الفني وحياتها الشخصية.
أبرز تصريحات فيفي عبده
ونرصد لكم أبرز تصريحات فيفي عبده:
- مبقاش فيه الحب اللي إحنا متعودين عليه في الوسط الفني، ويمكن الدنيا اتغيرت لأني كنت راقصة بس مش بمثل.
- الدكتور قالي اتفرجي على حاجات تضحك من كتر ما نفسيتي تعبانة.
- مبسوطة جدًا من المشاريع اللي معمولة في مصر، والدواء هنا بـ 30 جنيه أروح دولة ألقيه هناك بـ 600 درهم، ده أنا أبوس الأرض اللي بمشي عليها في مصر.
- ميزتي أن الأجيال كلها عارفين فوفا وبتعمل إيه، وأي حاجة بقولها بتبقى تريند عند الشباب.
- عادل إمام بيحبني جدًا علشان عرفت أربي ولادي كويس.
- أنا عملت عمرة وحجيت 5 مرات عملت فرض ربنا، كفاياكم تقولوا الرقاصة، هو مفيش شماعة مايلة غير الرقاصة؟ لأ الرقاصة دي ليها ناسها بيحترموها وبيتفرجوا عليها، قرفونا وزهقنا من كلمة رقاصة كلمة مالهاش لازمة.
- بيسألني على الهواء اتجوزتي كام مرة؟، ما خلاص خلصنا يا أخي، مش حلو أبدًا ودي حاجة سخيفة أوي، حاجاتي الخاصة مالكش دعوة بيها ولا تسألني فيها.
- كلمني على شغلي والحاجة اللي افتخر بيها زي ولادي، مفيش أسئلة جديدة خالص، والموضوع بقى سخيف أوي.
- الجيل الحالي بعافية شوية، والرقص زمان كان ليه هيبته وقيمته، واللي كان بيتفرج كان له تقله مش زي دلوقتي.
- دلوقتي الرقاصة بالزمبالك كأنها لعبة وبيقلدوا بعض، أنا كسرت الدنيا بالجلابية، ولما كنت فقيرة مكنتش بقدر أشتري بدلة أرقص بيها، ولما ربنا إداني جبت 5 مصممين أزياء واشتريت.
- غلطة عمري أني مصورتش المسرحيات اللي عملتها، أنا عملت 15 مسرحية واللي اتصور حوالي 3 بس، ودلوقتي براجع نفسي بعد ما بقى في ميديا هتجنن ليه مسجلتهمش.
