ميدو: محمد صلاح مينفعش يبقى كابتن وميهمنيش يزعل مني.. وكان هينضم للإخوان
علق أحمد حسام ميدو نجم نادي الزمالك السابق ومنتخب مصر، على أزمة محمد صلاح الأخيرة مع منتخب مصر.
تصريحات أحمد حسام ميدو
وقال أحمد حسام ميدو في تصريحات تلفزيونية: صلاح مينفعش يبقى كابتن، وأنا بيتدفعلي فلوس عشان أقول رأيي زيك كده القناة بتديلك فلوس عشان تقولي رأيك، صلاح مش كابتن مينفعش يكون كابتن.
وأضاف ميدو: موضوع الكابتن له عُرف في مصر إنه لازم يبقى قديم أنا مهما لعبت برا متجرأش أطلب أكون كابتن، وأنا شايف حجازي قائد، وميهمنيش صلاح يزعل مني لأن دي شغلتي.
وأكمل: لو حصلي إصابة عمري ما أسيب المنتخب، وفي 2006 جالي إصابة في العضلة الضامة ولعبت وأنا مصاب وكابتن حسن شحاتة يشهد.
وأضاف ميدو: صلاح طريقة تفكيره إنجليزي ولازم تتعاملوا معاه كده، وصلاح وطني عشان كفاية إنه بييجي المنتخب وهو بإيده ميجيش، مهما كان هو مين لازم كل اللعيبة تساعده، كان لازم يمضي لأنه على قوة المنتخب.
وأردف: ناس كتير أوي كان نفسهم يطلعوا إخوان، وفي وقت سابق لاعب كرة قدم سابق شدوه للإخوان، ووظيفة اللاعب ده إنه يجند باقي اللعيبة، يعني فيه 6 لاعبين من الأهلي اتجندوا، وتواصلوا معايا وجربوا يجندوني للإخوان ودخلوا عليا دخلة فلسطين وكلام حلو كتير قلتله امشي يالا.
وأتم ميدو تصريحاته قائلا: المسؤولين اتدخلوا ولحقوا محمد صلاح لأنه كان هيتجند، واشتغلوا على صلاح كويس جدًا ولحقوه، وصلاح وطني وقام بأدوار كبيرة لصالح مصر، والمسؤولين عرفوا القصة وجابوا صلاح وعملوله غسيل مخ لأنه ساعتها كان صغير.
