بوسي ترد على تصريحات هشام ربيع: معملش حساب للعِشرة.. واتكلم في شرفي وعرضي|فيديو
ردت الفنانة بوسي على تصريحات طليقها هشام ربيع، التي اختص بها القاهرة 24 تعليقًا على تصريحاتها التلفزيونية الأخيرة، إذ أكد أن تصريحات الفنانة كاذبة، مضيفًا بأنه سُجن بسببها.
وعلقت بوسي من خلال تسجيل صوتي، نشرته الإعلامية بسمة وهبة عبر حسابها الشخصي بموقع إنستجرام جاء فيه: شوفتي يا بسمة، وتقولي أقوله بحبه أنا ندمانة إني قلت الكلمة دي ومكنش ينفع أقول كدة.
وأضافت بوسي: شوفتي طالع يقول إيه وبيتكلم في عرضي وشرفي، من ساعة ما حصلت المشاكل وأنا عمري ما جبت سيرته بكلمة وحشة، لأن دي تربيتي وأخلاقي، دا الفرق بين تربية شارع الهرم والكباريهات وتربية ابن الناس اللي بيفهم في الأصول.
بوسي: هشام معملش حساب للعشرة
استكملت بوسي: مكنتش متخيلة أن الشهرة واكله دماغه وإن هو بيستغل الشهرة على قفايا، على قفا الست اللي كانت مراته في يوم من الأيام، اللي كانت بتنام جنبه على سرير واحد، وبياكلوا عيش وملح مع بعض.
وواصلت بوسي: أنا مصدومة معنديش كلام أقوله بجد، والمشكلة أني يوم الحلقة بعد ما مشيت جه واتعشى معايا وكانت علاقتنا كويسة جدا، ومكنتش متخيلة إن بعد الكلام الكويس اللي قولته واطلعه مظلوم وإنه اتعرض للنصب، يبقى جزائي يتكلم في شرفي وعرضي.
وأكملت بوسي: مش قادرة أقول غير حسبي الله ونعم الوكيل، دا الفرق بين تربيتي وأخلاقي وتربيته، والمشكلة مش عامل حساب للشهر الفضيل، وإننا في رمضان، وكان بيعمل عمرة وفي بيت الله وقدام الكعبة، وطالع بيتكلم عن مراته اللي كانت في يوم من الأيام على ذمته وشرفه.
واختتمت بوسي، قائلة: أنا غلطانة إني قولت عليه كلمة حلوة دا معملش حساب للعشرة، دي ملهاش علاقة لا برجولة ولا أخلاق مع إن النهايات أخلاق، وحسبي الله ونعم الوكيل.
بسمة وهبة لبوسي: بلاش تتعاتبي إنتي وهشام على الملأ
وسبق وكشفت الإعلامية بسمة وهبة، أن المطربة بوسي وجهت لها رسالة بعد عرض حلقاتها معها، التي تحدثت من خلالها عن طليقها هشام، إذ أكدت أنها ما زالت تحبه، متمنية له الخير في حياته.
وشاركت بسمة وهبة مقطع فيديو عبر حسابها الشخصي بموقع إنستجرام، جاء فيه: أنا جاتلي رسالة صوتية من المطربة بوسي، بتعاتبني فيها لأن أنا كنت بحاول أبقى حمامة السلام وأني أضغط عليها إنهم يرجعوا لبعض.
وأضافت بسمة وهبة: حقيقة الرسالة دي، أنا شايفة إن زي ما سمعتها لازم هشام يسمعها، وبطلب من هشام وبوسي إنهم يلتزموا الصمت وكفاية لحد كدة، لأن الأمور بدأت تدخل في سكة مش حلوة.
وطالبت الإعلامية بسمة وهبة من هشام طليق بوسي، أن يلتزم الصمت، قائلة: عايزة هشام لما يكلم بوسي يعاتبها ميكنش على الملأ، وبوسي كمان لما تعاتب هشام ميكنش على الملأ، والحقيقة بوسي مغلطتش أبدا في هشام في أي حوار.
واختتمت بسمة وهبة حديثها قائلة: هشام أنت راجل، وشهم وابن بلد، اتكلمت معايا، وأنا احترمتك جدا، وبوسي كانت مراتك في يوم من الأيام عايزين الموضوع ده يتلم كدة وأتمنى إنه ميكبرش أكتر من كدة.
