بسمة وهبة: ضغطت على بوسي علشان توجه رسالة لطليقها ونسيت إن فيه زوجة تانية
كشفت الإعلامية بسمة وهبة، رأيها في الأزمة التي نشبت بين المطربة بوسي وطلقيها هشام ربيع، بعد تصريحات الفنانة الأخيرة إنها مازالت تحبه، الأمر الذي دفع طليقها للرد عليها بأنها كاذبة وتريد أن تهدم بيته.
وقالت بسمة وهبة في تصريحات لـ القاهرة 24: بوسي وهي معايا في الحلقة مغلطتش في هشام، وأنا كنت بتكلم مع واحدة مطلقة.
وأضافت بسمة وهبة: اللي عرفته إنها بتحبه وهو بيحبها، فأنا بقولها في الحلقة ليه مترجعوش لبعض، لأني لاحظت إنها مبتغلطش فيه بالعكس كانت بتتكلم عليه كويس، قولتلها طب نهدي النفوس وتقوليلوا كلمتين حلوين في الكاميرا.
وأكملت بسمة وهبة: ضغطت على بوسي ونسيت إن فيه زوجة موجودة أكاد أكون أخطأت، ولكن أنا شايفة إني مغلطش لهذه الدرجة، لأن هشام كان عنده زوجتين فلما يطلق واحدة وبعدين تقوله إنه لسه بحبك مش شايف أن ده يخرب البيت زي ما قال.
بسمة وهبة: ابن البلد ميعملش كدة في واحدة كان على ذمته
وواصلت بسمة وهبة: بعد حلقة بوسي هشام رن عليا، قالي أنا بشكرك على الكلام اللي قولتله في حقي، وعرفت أنه بيعمل عمرة ومراته زعلت من الفيديو اللي أتعلم والجملة اللي قالتها بوسي.
وتابعت بسمة وهبة: فوجئت بالفيديو اللي هشام عمله، أنا زعلت وكلمته قولتله أنا بعتب عليك لأن بوسي كانت زوجة ليك في يوم من الأيام، وأنت ابن بلد وشهم، وابن البلد ميعملش كدة في واحدة كانت على ذمته.
واختتمت بسمة وهي حديثها قائلة: أنا كان قصدي خير، أنا مستغربة أنه بيقولها أنتي خربتي بيتي، لما قالت إنها بتحبه طب بيته متخربش لما كانوا الاتنين على ذمته.
