أسما شريف منير: بقضي رمضان لوحدي للتقرب من الله.. وأي حد بيلتزم مينفعش يخرج |فيديو
تحدثت أسما شريف منير عن طقوسها في شهر رمضان الكريم، مشيرة إلى أنها تقضي معظم وقتها في العمل وبمفردها، حيث تريد أن تكون في حالة سكون وتقترب أكثر من الله وتلتزم بالصلاة.
وقالت أسما شريف منير خلال لقائها مع القاهرة 24: بقضي رمضان أغلب الوقت في شغلي ولوحدي ومش بعمل تجمعات السنة دي، وبحاول أكون في حالة سكون وأقرب أكتر من ربنا ويكون عندي وقت للتراويح والصلاة وبحاول أعمل دايت، وأي حد في الدنيا بيحاول يلتزم ما ينفعش يكون طول الوقت بيخرج، لأن الحاجات دي بتعمل ضغط وبتخليكي ما تعرفيش تلتزمي.
وأضافت أسما شريف منير، أنها لا تحب العزومات في رمضان خاصة هذا العام موضحة: لو روحت عزومات هبوظ الدايت، وأنا معنديش حالة المقاومة إني اشوف قطايف وأقولها لاء، وأنا قاعدة في بيتي بعمل طبق السلطة وعارفة هعمل إيه، ولما الآذان بيأذن بتوضى وأصلي في أوضتي على طول، غير لما أشوف هتوضى فين وهلبس إيه، حسيت إن رمضان علشان كده مش أي حاجة تانية.
وعن الأكلات التي تحبها في رمضان، قالت: أكتر أكلة بحبها الملوخية والبط والرز وبطبخ بنفسي وبحب الطبخ جدًا، والأكلة دي بحب أكلها أول يوم رمضان.
وعن مشاركتها متبايعها طقوسها الدينية قالت: بحب أشارك الحاجات دي رغم أن فيه ناس بتقول علاقتك بربنا لازم تكون لوحدها، لكن أنا طماعة وتخيلي لو أنا عملت شكل كورنر للصلاة، حلو ويفتح النفس فشجعت الناس، ولو قمت صليت الفجر وحد مكسل وقام بسببي هياخد حسنات وأنا هاخد حسنات وأنا عندي ناس كتير فهاخد حسنات كتير، وأنا نفسي في ناس بتشجعني وبتفتح نفسي أني مثلا أقوم ألعب رياضة لما ألاقي حد مقلبظ بيعمل رياضة وبيخس وده بيحفزني، ولذلك بحب أعمل حاجات تحفز الناس.
