الفنانة ليلى عز العرب: زوجى رحل بلا وداع
كشفت الفنانة القديرة ليلى عز العرب، عن محنة فقدها لزوجها وشريك عمرها في الأيام القليلة الماضية حيث كانت خارج مصر ما جعل المفاجأة مضاعفة، قائلة: كنت مرتبطة بيه جدا، آخر لقاء بينا كان بيوصلني المطار وتواعدنا أننا نلتقي بعد عودتي لكن للأسف متقابلناش تاني لأنه مات، والغريب أنه كان بقاله فترة مش بيوصلني المطار بسبب ظروف عمله لكن المرة دي كان مُصر، قلبه وقلبي كان حاسس.
الفنانة ليلى عز العرب: شريك حياتي رحل بلا وداع.. ومات من فترة قليلة ومن كتر حزني عليه لم أُعلن للرأي العام
وأضافت ليلى عز العرب في حوارها مع الكاتب الصحفي أحمد الخطيب، ببرنامجه «كلم ربنا»، المُذاع على راديو «9090»: أقدر أقول أن أكبر محنة مريت بيها في حياتي لما فقدت شريك عمرى وحبيبي وزوجي.. الصدمة كانت جامدة عليا.. من يومها مبعملش حاجة غير إني بكلم ربنا وأطلب منه الصبر.. وبنتظر رده عليا لما بفتح كتابه الكريم وأقرا فيه.. ورسالته ليا بتكون في أول آية تشوفها عيني أول ما بفتح المصحف.. مبقاش ليا حد غير ربنا بلجأ له وبتكلم معاه بدون حواجز أو حدود.. هو الدايم واللطيف والرحيم بطلب منه السكينة والصبر وسعة الصدر.
وأكملت الفنانة ليلى عز العرب: أنا بكلم ربنا.. هو ونيسي وهو اللي ليا في الدنيا.. وبقيت أكلمه أكتر وأعمق بعد المحن والابتلاءات اللي مريت بيها في حياتي.. ولما بحب أعرف رد ربنا عليا بفتح المصحف على أي صفحة والآية اللي عيني تقع عليها.. بتكون فيها رسالة من ربنا ليا.. دا اعتقادي في كلام ربنا.. آخر مرة عملت كدا عيني وقعت على آيه (إنك ميت وإنهم ميتون).. ونزلت على صدري وقلبي بردا وسلاما.. وكأن ربنا بيقول لي اقبلي وارضي هذا هو مصير الإنسان على الأرض.
وواصلت ليلى عز العرب: أنا اخترت زوجي عن قصة حب شديدة استمرت سنين.. بينا ذكريات كتير لدرجة أننا اتخطبنا في عيد الفالانتين وتزوجنا في عيد الحب المصري عشان نخلد أسطورة ما في حياتنا وعشان نفضل نتذكرها طول الوقت.. لذلك كانت صدمتي في وفاته عنيفة جدا.. والمفاجأة كانت أصعب حاجة حصلت لي في محنة فقد شريك العمر.. لأن مكنش فيه مقدمات لوفاته ولم يمرض ودي كانت أمنيته أنه يتوفى وهو واقف على رجله.
