حاتم صلاح عن دوره مع أمينة خليل في الكبير: إنسانة متواضعة ولطيفة ومتعاونة جدا
تحدث الفنان حاتم صلاح عن مشاركة أمينة خليل ضيف شرف في مسلسل الكبير أوي 8، وظهورهما سويًا في أكثر من مشهد سويًا في الحلقة الرابعة من المسلسل، حيث كان يرغب في الزواج منها وطلب من الكبير مساعدته ليتزوج منها فدعاها لمهرجان المزاريطة كذبًا وبعد محاولات أخبرها بأنه يحبها ويريد الزواج منها ووافقت.
وقال حاتم صلاح في حواره مع القاهرة 24: أمينة خليل إنسانة متواضعة ولطيفة ومتعاونة لأبعد الحدود وسعيد بالتعاون معها، وعلى المستوى الشخصي بحبها وبشوفها نجمة مهمة ومسلسلاتها مهمة، وبشوفها نجمة درامية مهمة جدا، وكنا قلقانين إنها تستغرب الضحك بتاعنا، لكنها كانت لذيذة وبتهزر.
كما تحدث حاتم صلاح عن تعاونه مع أحمد مكي ومساعدته له قائلًا: بحبه جدا وبعتبر نفسي صاحبه، واستفدت منه جدًا وساعدني، خاصة إنه لما بيشتغل عنده روح الفريق، وممكن تلاقيه في مشهد واقف ساكت، والمسلسل اللي بطولته إحنا واقفين بنقول وهو بيفرش ويساعد، وفي وقت تاني العكس.
وأضاف حاتم صلاح: بنتعامل كفريق، وبنروح ننبسط علشان نقدر نبسط الناس وده اللي بيهتم به الجندي وأحمد مكي، وده اللي شايفه مهم في الكوميدي، ومش شرط علشان بطل العمل هو اللي يعمل ويقول كل حاجة، لكن مكي مدينا مساحة كبيرة جدا، وده اللي مخليني ساعات برفض حاجات كتير، لأنك ممكن تخاف تشتغل مع نجوم أقل من مكي ما يدوكش نفس المساحة، ومكي بيتعامل كفرد من الفريق ممكن كلنا نفكر في جملة، علشان حد بيقول حاجة حلوة.
