كهربا: أنا رقم 1 في مصر.. ومش شايف حد وبقول لحسام حسن أنا جايلك
تحدث محمود كهربا لاعب النادي الأهلي، عن بعض الأمور المتعلقة بالنادي الأهلي، وكشف بعض الأسرار حول بعض الأمور الشائكة.
وقال كهربا خلال تصريحات تليفزيونية: “أنا قررت أدفع الغرامة وقولت أكمّل كورة أحسن وكابتن حسين لبيب شخصية محترمة بس مقعدتش معاه هو تواصل مع وكيل أعمالي وفيه جزء اتدفع وجزء تم تقسيطه”.
كهربا: أنا رقم 1 في مصر ومش شايف حد
وزاد كهربا خلال تصريحاته: لعبت مع أجيال كتير وشايف أن طول منا بتمنى الخير لزميلي؛ الخير هيجيلي واللاعيبة كلها ساعدتني أما رجعت من الإيقاف لحد ما وقفت على رجلي وبقيت سبب في قيادة الفريق للفوز، لدرجة أن الشحات وحمدي قالولي “لو الجون فاضي وأنت ليك فرصة تهدف هنديك الكورة”.
وشدّد: اتبسطت لما كولر قال أن أنا رقم 3 لأن دا هيدفعني أن أنا أموّت نفسي أكتر ومفيش أي مشاكل بيني وبين مستر كولر وبحبه جدًا وهو بيحبني أوي وهو بالنسبة لي قائد المركب، وجوة نفسي أنا رقم 1 في مصر ومش شايف حد.
وأشار خلال تصريحاته: اتعلمت من أخطائي اللي فاتت ولحقت نفسي أن مفيش حاجة في حياتي غير في الكورة.. والناس متضايقة مني عشان بعمل كل حاجة في حياتي وساعات بيطلعوا إشاعات مبنيّة على أشياء مبتحصلش ولا حصلت.
وعن مباراة نهائي كأس مصر وجائزة أفضل لاعب في المباراة، كشف كهربا عن رسالة حارس الفريق محمد الشناوي قائلًا: الشناوي جمعنا وقالنا أن لو لاعب من عندنا خد جائزة أحسن لاعب في نهائي الكأس هتتوزع علينا كلنا، وكنا مركزين على أننا نكسب وربنا كرمنا والدنيا مشيت وفرحنا جمهور الأهلي.
وأضاف: وأنا في كأس الأمم الإفريقية مع المنتخب جالي عرض من الحزم ورقم كبير ليا، واتكلمت مع النادي، لكن مستر كولر والخطيب اتمسكوا بيا وبلغوني انهم محتاجني فـ رفضت العرض.
وأكمل كهربا خلال تصريحاته: موضوع أن أنا جبت امام عاشور دا مش صح هو أخذ رأيي وأي حد يتمنى يلعب في الأهلي، وأنا حاولت أعمل كل حاجة عشان أخليه مبسوط، وقولتله تيجي تنور النادي وهنا اخواتك هيساعدوك وهتبقا رقم واحد ودلوقتي هو أحسن لاعب في مصر بسهولة.
وتابع: “إمام الأهلي أحسن من إمام الزمالك، ولسة، لأن إمام لعيب كبير أوي وكلنا بنساعده على النجاح.. وهو لاعب كبير وهيعمل كل حاجة في الأهلي وهينجح وأول ما جه دخل وسط الفرقة واللاعيبة كلها حبّته”.
وأكد: لما جه خسرنا السوبر الإفريقي فـ قولتله اصبر ربنا هيكرمك والفترة الجاية احنا معاك.. أنا أول ما جيت خسرت السوبر المصري وعادي جدًا.. وربنا أكرمه وكان سبب في إنه يقود الأهلي للفوز بالكأس على حساب الزمالك.
كهربا: قولت لـ اللاعيبة لو رحتوا للمدير الفني وقولتوله عندنا مناسبة مش هيوافق
وعن أزمة مباراة ميدياما بدوري الأبطال، قال كهربا: أنا مسيبتش الأهلي، دي أختي الوحيدة وقمت بتأجيل الفرح 4 شهور لارتباطي بمباريات مهمة رفقة الأهلي، ولم أكن أعلم أن في هذا التوقيت سيتزامن موعد اللقاء مع حفل الزفاف، وقلت أن هذه المباراة ليست مباراة صعود، ولكني حاولت تأجيل الفرح لآخر يوم، لكن قد قمت بالترتيب، و“مكنش ينفع مكونش موجود مع أختي الوحيدة.. ومش عادتي أن أنا بهرب من الماتش”.. واللاعيبة قالولي احنا هنموّت نفسنا عشان نكسب ومحدش يشيّلك المسؤولية.
وأضاف: كولر قالي هنشوف، وقولت لـ اللاعيبة لو رحتوا للمدير الفني وقولتوله عندنا مناسبة مش هيوافق، وأنا رحت لـ كولر تاني وقولت له أنا عمري ما سيبت الفريق في أي وقت، فـ قالي عشان ترجع هتحتاج مجهود مضاعف عشان ترجع تلعب من تاني.
كهربا: بقول لحسام حسن أنا جايلك
واختتم تصريحاته، بتوجيه رسالة إلى التوأم: هرجع المنتخب وبقول لحسام حسن أنا جايلك.. وعلاقتي بيهم كويسة بس اتخضيت أن اسمي مكنش في القائمة لأني كنت متأكد إني هتواجد.
