أمير مرتضى يكشف كواليس المكالمة المسربة.. وحقيقة التصالح بين والده وممدوح عباس
تحدث أمير مرتضى منصور المشرف العام السابق في نادي الزمالك، عن حقيقة المكالمة التي سربت له مع أخيه أحمد مرتضى، وكذلك عن حقيقة التصالح بين والده وممدوح عباس.
تصريحات أمير مرتضى منصور
وقال أمير مرتضى منصور في تصريحات تلفزيونية: مكالمتي مع أخويا أحمد كانت حوالي 25 دقيقة، واللي اتسرب منها حوالي 3 دقائق فقط، وكنت بقنع أحمد مينزلش انتخابات، وده كان قبل غلق باب الترشح بيوم.
وواصل: كنت بقنعه نرتاح كلنا عشان نركز في اللي معانا وده كان طوال الـ 30 دقيقة، وماتكلمتش في أعراض حد ومغلطش في حد، ومعرش اتسرب ازاي.
وأكد أمير: كتير بيحارب عائلة مرتضى منصور داخل أسوار نادي الزمالك، أبرزهم ممدوح عباس، مع إني بحبه أوي.
وأكمل: أيمن عباس بيأهل نفسه عشان يتولى رئاسة نادي الزمالك، ومعرفش إنه يصلح أو لا، مقدرش أحكم عليه، لكن هو شخص محترم.
وواصل: نادي الزمالك مع ممدوح عباس كان هينزل درجة تانية في العشرية السوداء، وهو بيحب النادي لكن من منظوره.
وأكمل: ممدوح عباس كان عنده كل المؤهلات أنه ينجح بقايمته الانتخابية كاملة.
وأكد: قعدت مع عمر الجنايني ومدحت العدل وقلتلهم أيه رأيكم نصالح ممدوح عباس مع مرتضى منصور ونستفاد منه ماديًا طلاما بيحب نادي الزمالك أوي، ونعمله تمثال في النادي.
وكشف أمير: ممدوح عباس عمل عملية خطيرة في المخ، رحتله أوضة العمليات وبوسته وسلمت عليه، وهو قعد يهزر معايا.
وأكد: رحتله عشان يبقى فيه ود بينا، وكان ساعتها مرتضى في السجن وقلي روح زور ممدوح عباس عشان عمل عملية كبيرة، رغم أن محدش زار والدي.
