سيد عبد الحفيظ: مكنش هييجي في دماغي أن فريق بحجم الزمالك هيخبي الكور
تحدث سيد عبد الحفيظ مدير الكرة السابق بالنادي الأهلي، عن مباراة الزمالك، في اللقاء الذي تلقى فيه المارد الأحمر هزيمة بثنائية مقابل هدف.
تصريحات سيد عبد الحفيظ
وقال سيد عبد الحفيظ في تصريحات تليفزيونية: تفاجأت بتشكيل كولر في مباراة الزمالك، وحساباته مكانتش مُوفّقة، ولكن دا وارد، بس مش عايزين نقف على خسارة الأهلي أمام الزمالك؛ لأن الأهلي عنده مباراة مهمة أمام مازيمبي وأمامه فرصة صنع الإنجاز بالصعود لنهائي جديد.
وأضاف: أسوأ لقطة في المباراة هي لقطة تخبية الكور، واللقطة دي تحصل في شمال إفريقيا مش هنا، وعملت لقطة ماتش الوداد لأن كان في سابقة قبل كدة وكنا عارفين أن الوداد لو جاب جون مكناش هنلعب غير 10.. 12 دقيقة.
وواصل سيد عبد الحفيظ: في نهائي الوداد كان الكاف مدينا 10 كور وأنا كان معايا الـ 10 كور، وامبارح مكنش هييجي في دماغك أن فريق بحجم الزمالك هيعمل الحركة دي.
وأكد: التصرف دا مسؤولية إبراهيم نور الدين، وكان المفروض يوقف الماتش ويروح للجهاز الفني أو الحكم أو المراقب ويسأله فين الكور وياخد إجراء.
واستكمل سيد عبد الحفيظ: طول منتا بتشتغل في العمل العام لازم يتساوى عندك المدح والذم، وكان في ناس كتير بتذم فيا وتنتقدني وهذا طبيعي، وأنا مش شايف الدنيا سوداء أوي يعني، وانت لو كسبت ماتشاتك فهتبقى متصدر بـ أربع نقاط، وماشي مقبول شوية، لكن في بعض الأرقام اللي ممكن تكون جرس إنذار أن مينفعش يدخل في الأهلي أهداف في الوقت المتأخر من المباراة.
وزاد خلال تصريحاته: لازم الفريق يقفل صفحة الزمالك؛ لأنك قدامك خطوة وتوصل خامس فاينل دوري أبطال إفريقيا، وهذا يحتاج للتركيز، والكورة زي الدنيا يوم هيبقى حلو ويوم هيبقى وِحش.
واختتم: مفيش حد بيفتكر اللعبة الحلوة، وزي ما قلت قبل كدة الزمالك مينفعش يصبّر نفسه أنه لعب حلو في ماتش نهائي الكأس؛ لأن الكل في الآخر يتذكر النتيجة النهائية.
