قولتلهم ضافري اتكسر جابوني من شعري.. فتاة تستغيث من مركز تجميل في سكوير مول بأكتوبر
تعرضت فتاة تدعى نورين عصام للضرب على يد 3 سيدات تعملن في مركز تجميل داخل سكوير مول الكائن بالحي الأول في أكتوبر، بسبب شكواها لهم من سوء الخدمة، حيث إنها ركبت أظافر اصطناعية لدى مركز التجميل التابع لهن، وكُسرت فجأة، وعندما طلبت منهن إصلاح أظافرها تعدين عليها بالضرب المبرح.
استغاثة فتاة من مركز تجميل بأكتوبر
وقالت نورين عصام في تصريحات خاصة لـ القاهرة 24 إنها ذهبت لمركز التجميل بـ سكوير مول في محور الكفراوي بالحي الأول في مدينة السادس من أكتوبر، لتركيب أظافر اصطناعية في محل Lash in flash الكائن بـ سكوير مول الحي الأول، وفوجئت بعد عدة أيام من تركيبها للأظافر كسر ظافر منها، فعادت إلى مركز التجميل وطالبتهن بإصلاحه.
وأضافت نورين عصام ضحية سكوير مول: لما وصلت بتكلم مع البنت اللي هناك، وقالتلي إن ده سوء استخدام مني، قولتلها إنه مكسور من النص، إزاي ممكن يكون سوء استخدام مني، وكمان أنا مش أول مرة أركب ضوافر، واتكلمنا شوية وقالتلي تمام هنعمله، كنت وقتها بتكلم مع واحدة صاحبتي وبتسألني أنا فين وكده قولتلها إني بظبط ضوافري، قالتلي ده مكان مش حلو، فقولتلها أه هي فعلًا كانت تجربة سيئة.
وفوجئت نورين عصام برفض العاملة في مركز تجميل Lash in flash، إصلاح أظافرها، وطردتها من المركز، وخرجت ولم تعرهم أي انتباه، وفوجئت الأخيرة بتتبع 3 سيدات لها خارج المول، وسبها بألفاظ خادشة للحياء.
وأضاف: وأنا ماشية في المول ببص ورايا لقيت بنت معرفهاش ماشية ورايا، وبتبصلي وبتقرب مني وبتتكلم بصوت عالي وبتشتم بس أنا معرفهاش، فمتوقعتش إنها جيالي أنا، فجأة لقيتها عماله تزعق وتقول مين ده اللي مكان معفن، وزعيق زعيق، ولقيت بنتين تانيين جايين وراها، وكلهم بيزعقوا ويشتموا فيا، ويزقوا فيا، وأنا كنت عند السلم الكهربا، وكان فاضلي خطوة كمان وهقع، وبدأت واحدة فيهم تمسك إيدي، قولتلها متمسكيش إيدي كده، راحو جايبيني من شعري، وقعدو يضربوني هما التلاتة، وقعدت أصوت لحد لما جه ناس، وشالوها من عليا وطلعوا جريوا ودخلوا الكوافير تاني.
وأشارت نورين عصام إلى أن تلك الواقعة ليست الأولى من نوعها في ذلك المكان، وأنها لم تتعرض لمثل ذلك الموقف في حياتها، مضيفة: أنا مش عارفه أقول إيه من وقتها، وفي صدمة بجد مش مصدقة اللي حصل، أنا عمري في حياتي ما اتحطيت في الموقف ده، ولا توقعت إن ده يحصل معايا أبدًا.
وحررت نورين عصام محضرا بقسم الشرطة حمل رقم 4283 لسنة 2024 قسم أول أكتوبر، تستغيث فيه بالأجهزة الأمنية المختصة بجلب حقها من الـ 3 سيدات وأصحاب محل Lash in flash الكائن بـ سكوير مول الحي الأول في أكتوبر.
