فتاة تستغيث: مستشفى 6 أكتوبر بالدقي حبست ماما وخدوا تليفونها رهن
استغاثت فتاة من سوء المعاملة التي تعرضت لها والدتها في أحد المستشفيات الموجودة في الدقي، قائلة: الممرضات أخدوا الموبايل منها وحبسوها في المستشفى.
المستشفى حبست ماما وخدوها تليفونها رهن
وقالت ياسمين سامح: ماما كانت في مستشفى 6 أكتوبر بميدان المساحة في الدقي، حبسوها جوا وزقوها وقفلوا الباب الحديد عليها، عشان كانت بتزور واحدة صاحبتها.
وتابعت ياسمين في استغاثتها عبر حسابها الشخصي على تيك توك: ماما كانت نازلة تشحن تليفونها من العربية، عشان تسأل صاحبتها عن الحاجات اللي صاحبتها محتاجها، جاية تخرج الممرضة زعقت وقالتلها رايحة فين، وزعقت للأمن قالت له دي ما تطلعش برا.
وأضافت ياسمين سامح: ماما ردت عليها قالت لها أنتِ قليلة الأدب وأنا مش همشي أنا خارجة أشحن الموبايل، قاموا خدوا تليفونها رهن علشان ما تخرجش، وقفلوا الباب الحديد.
واستكملت: ماما قالتلهم هعمل محضر في القسم، قالولها روحي بلغي ولما تبلغي كلنا هنشهد ضدك.
وأردفت: ماما فضلت قاعدة ساعة في المستشفى بالغصب محبوسة، واخدين منها تليفونها ولا عارفة تكلم حد يلحقها، ولا عارفة تكلم الشرطة ولا عارفة تكلم حد مننا.
وواصلت: أنا محتاجة حق مامتي يرجع، ومحدش يروح مستشفى 6 أكتوبر اللي في ميدان المساحة، أنا مش عارفة دي مستشفى حكومي ولا لأ، بس ده مش طبيعي يحصل، ومعرفش مين مسؤول عن حاجة زي ديه، بس احنا عملنا محضر في القسم.
