مولود في الأرجنتين؟.. زكي عبد الفتاح يعلق على تصريحات حسام حسن | خاص
علّق زكي عبد الفتاح مدرب حراس مرمى منتخب مصر السابق، على تصريحات المدير الفني الحالي للفراعنة حسام حسن خلال جلسته رفقة الصحفيين.
وعبّر زكي عبد الفتاح عبر القاهرة 24 عن استيائه من تصريحات حسام حسن المدير الفني لمنتخب مصر، بعد التصريحات التي أطلقها نحو اللاعبين.
زكي عبد الفتاح يرد على تصريحات حسام حسن عبر القاهرة 24
وقال زكي عبد الفتاح في تصريحات خاصة لـ القاهرة 24: حسام حسن لما يقول كدة على اللاعيبة أن لاعب يلعب تمريرة أو اتنين وبتتقطع؛ دي إهانة لـ اللاعبين، فـ هياخدها ازاي بعد كدة يمرنهم وهو قايل كدة عليهم؟.
وأضاف خلال تصريحاته: هو حسام حسن مولود في الأرجنتين ومش شايف الدوري المصري؟ مهو عارف أصلا كل دا، والـ 3 أو 4 أيام هي اللي هتفرق يعني في إن إزاي اللاعيبة تسلم وتستلم.
وأضاف زكي عبد الفتاح خلال تصريحاته: حسام حسن معندوش رؤية مع أنه أول مدير فني ييجي والشعب بيدعمه من أهلاوية وزمالكاوية، لكنه خسر كل دا في ظرف أسبوعين فقط، فخسر الأهلي لما عمل مشاكل، والزمالك لما مخدش غير لاعب واحد.
وزاد في تصريحاته لـ القاهرة 24: حسام وإبراهيم حسن مبيعرفوش يشتغلوا غير في العداوة وأنهم يخلقوا حرب عشان لو فشلوا يبقى الناس بتحاربنا وبتكرهنا ومفيش حد عاوزنا ننجح، هما بيشتغلوا على كل دا.
وأردف زكي عبد الفتاح: كمان حسام حسن بيخسر اللاعبين المحترفين، وعاوز يعمل زي كابتن محمود الجوهري، هو لسة عايش في التمانينات، هل هو فوجئ أن اللاعيبة مبتجيش غير قبلها بـ 3 أيام؟ دا بيتكلم أكنه في دولة تانية، ولو انت شايف كدة فـ ليه قبلت مهمة تدريب منتخب مصر من الأول.
واختتم مدرب حراس المرمى لمنتخب مصر السابق تصريحاته لـ القاهرة 24، قائلًا: كل دي حاجات صغيرة بس بتفرق مع اللاعيبة وهيقولوا يارب منروحش، ودا ميمنعش إني عاوزه ينجح، لكن خلينا متفقين أن اتحاد الكرة مش هيقدر يعمله حاجة والمنظومة كلها ماشية بمبدأ “يلّا نفسي”.
