رانيا منصور تكشف تفاصيل تعرضها للتحرش في حفل وائل جسار: كان لفظيا وبيته في الحجز
كشفت الفنانة رانيا منصور تفاصيل تعرضها للتحرش خلال حضورها حفلا غنائيا للمطرب وائل جسار بمنطقة مدينة نصر بالقاهرة، حيث حررت محضرًا في قسم الشرطة، قبل أن يتم تسوية الأمر بين الطرفين وديًا.
رانيا منصور تكشف تفاصيل تعرضها للتحرش في حفل وائل جسار
وقالت رانيا منصور في تصريحات لـ القاهرة 24، إنها تعرضت للتحرش اللفظي وأبلغت الأمن وحررت محضرًا رسميًا، وبعد القبض عليه وحجزه في القسم قررت عدم استكمال الإجراءت والتنازل، بعد محايلات من أسرته وإبلاغها بأنه مختل نفسيًا، فاكتفت بحجزه ليلة في القسم وعدم تصعيد الأمر.
رانيا منصور: التحرش كان لفظيًا وما لمسنيش
وأوضحت رانيا منصور: كان تحرش لفظي وما لمسنيش.. ولما حصل كده بلغت الأمن والشخص ركب الأسانسير وكانوا متتبعينه بالكاميرات لحد ما جابوه وقلت لهم عاوزة أعمل محضر رسمي، ومسكوه وبيتوه ليلة في الحجز والإجراءات مشيت رسمية والنياية استدعتني وطلبت استجوابي، وأهله قالوا لي إنه شخص مختل وشكله فعلا مش سوي ومكنش عنده جرأة يلمسني، ولما أهله قالوا لي إنه مش سوي وعرفت إن الإجراءات لو تمت هياخد حكم ولو أثبتوا أنه مريض هيدخل المستشفى وهيتئذي، حسيت أني خدت حقي بأني بيته ليلة في الحجز، ولو كان مد إيده عليا كنت هكمل الإجراءات.
رانيا منصور: مكنش ينفع أسكت لأني اتأذيت
وأضافت رانيا منصور: مكنش ينفع أسكت لأني اتأذيت وكان من حقي آخد إجراء قانوني، وكونه مريض نفسي ما يعفهوش، لكني حسيت إني راضية نفسيا أنه يبات ليلة في الحجز وده درس بالنسبة له، مضيفة: ولما أهله قالوا إحنا صعايدة وما يرضناش اللي عمله، قلت كفاية عليه.
وأشارت منصور إلى أن بعض زملائها كانوا ينصحونها بالسكوت، لكنها رفضت ذلك ونصحت الفتيات بأن لا يسكتن عن حقهن، قائلة: في ناس قالوا لي خلاص اسكتي وأنتي كويسة الحمد لله، قلت لهم أني اتأذيت نفسيًا ولو سبته ممكن يعمل أكتر من كده وأنا شخص كبير وقادرة آخد رد فعل وتخيلت بنتي مكاني، مختتمة: ونصيحتي لأي بنت متسكتش على حقها
