اعترافات بائعة الخضار المتهمة بقتل شاب بالطالبية: كنت بدافع عن نفسي ومكنتش اقصد أموته
كشفت التحقيقات في القضية التي تحمل رقم 5308 لسنة 2024 جنح الطالبية، المتهم فيها بائعة خضار بقتل شاب باستخدام سلاح أبيض “سكين”، لخلاف دار بينهما على أولوية ركوب توك توك، ثالث أيام عيد الفطر المبارك، تفاصيل الواقعة.
اعترافات بائعة الخضار المتهمة بقتل شاب بالطالبية
وجاءت أقوال بائعة الخضار المتهمة بقتل شاب بمنطقة الطالبية كالتالي: اللي حصل أن المجني عليه ضربني بالرجل في رجلي، وأنا قلعت الشبشب بتاعي وقتها علشان أضربه بيه راح واخده من إيدي وضربني بيه على راسي، وأنا كنت بصوت علشان أستنجد بالناس، وساعتها كان سواق التوك توك واتنين تانيين ماشيين في الشارع بيحاولوا يفضوا الخناقة، وأنا مكنتش عارفة أعمل إيه، فأنا جريت على فرشة الخضار بتاعتي وجبت سكينة الخضار اللي بقطع بيها الخضار، وهو طلع مطواة من جنبه ومسكتها من أيده وكنا بنهوش في بعض وبعدين أنا ضربته في صدره وطلعت أجري.
وأضافت بائعة الخضار المتهمة بقتل شاب بالطالبية: بعدين هو جري ورايا من أول الصيدلية لحد محل الكهربائي بتاع عبده القط، وقتها أنا أتكعبلت ووقعت على الأرض وهو وقع وصاحبه اللي كان معاه قومه من على الأرض، وسنده ووقف توك توك، وبعدين هما ركبوا ومشيوا وبعدها أنا رجعت على فرشة الخضار بتاعتي لميت الفرشة وغطيتها، ووديت العربية الكارو الجراج اللي بجرج فيه وقولت أروح على بيتي اللي في الطالبية، عشان كنت خايفة لأحسن العيال دي يجيبوا ناس ويرجعوا يعوروني.
وأكملت المتهمة أقوالها أمام جهات التحقيق، قائلة: المشاجرة دارت بينا حوالي عشر دقائق، وأنا كان في دماغي أن الموضوع يخلص وميعورنيش وميطولنيش بالمطواة اللي كانت معاه، والكلام ده حصل يوم الجمعة 12/ 4/ 2024 حوالي الساعة 10 الصبح قبل صلاة الجمعة في شارع العروبة قدام صيدلية الحسيني بمنطقة الطالبية، وأنا كنت لوحدي وكان في واحد سواق توك توك واقف معانا معرفش اسمه، واللي حصل أنا قولت عليه وأنا اللي رحت سلمت نفسي ومحدش قبض عليا.
وأردفت المتهمة في أقوالها أمام جهات التحقيق: وبعدين أنا كان قصدي إني أدافع عن نفسي ومكنتش أقصد أموته، لأني كنت بهوشوا ومكنتش عارفة أن كل ده هيحصل وكان قصدي إني أعوره بس وهو ميعورنيش بالمطواة اللي كانت معاه، وبعدين أنا ندمانة وأول مرة الموقف ده يحصل معايا، وبسؤال المتهمة هل لها اسم شهرة، قالت أيوه لي اسم شهرة هند جرجير.
وبسؤال المتهمة عن مكان السلاح المستخدم في الواقع قالت أنا بحطه على فرشة الخضار بتاعتي علشان أنضف الخضار بيه، وأنا بعد لما سلمت نفسي في القسم أمبارح سألوني على السكينة اللي عورت بيها اللي مات قولتلهم في المباحث أنها موجودة على فرشة الخضار بتاعتي والمفروض أنهم بعتوا حد من المباحث علشان يجيبها من هناك.
وواصلت المتهمة وشهرتها هند جرجير: أنا بدأت أشهر السلاح في وجه المجني عليه لما لقيته بيجري ورايا وأنا كنت بصوت وبستغيث بالناس ومش عارفة أعمل أي وخايفة يعورني جريت على الفرشة وجبت السكينة، وفضلنا نهز بعض ونهوش في بعض ورحت ضربته بيها ضربة واحدة بالسكينة.
