أخصائية توضح تأثير ضرب الأطفال على صحتهم النفسية
ظهر الفنان أحمد ماهر ونجله محمد مع الإعلامي عمرو الليثي في برنامج واحد من الناس، وخلال اللقاء كشف الفنان أنه كان يعاقب أبنائه بالضرب بالكرباج، موضحًا أن والده رباه على الصرامة.
تأثير الضرب على صحة الأطفال
وقالت الدكتورة سهام حسن أخصائي نفسي وتعديل سلوك الطفل واضطرابات لـ القاهرة 24: أولًا الضرب بيخلي الطفل شخصية حساسة، بيكون الطفل حساس، معندوش الثقة بنفسه، وبيكسبوا العنف والعدائية تجاه الأولاد الأضعف منه زي أخواته الصغيرين أو زمايله في المدرسة أو جيرانه.
وأضافت: ودائرة العنف بتكبر فيبدأ يكون عنيف مع والديه، أو طفل يكون مستسلم تمامًا لمسؤوليته، ومعندوش الثقة بنفسه أو ما عندوش القدرة على الدفاع عن الذات، فبيبدأ يراكم جواه العنف والغضب ده، ويبدأ بعد لما بيكبر يسقطه على الضعفاء، وده بيكون في دايرته الأولى زي الزوجة أو أبنائه، ما بيكونش طفل سوي والعنف بيفضل مستمر.
هل الضرب الخفيف يؤثر على الطفل؟
وأوضحت الدكتور سهام: تجتمع الأسباب كلها حوالين الضرب وتختلف أنواع الضرب لكن له نفس التأثير، وأي نوع حتى لو هو خفيف زي الأمهات اللي بتقول أنا ممكن أقرص قرصة سريعة من ودنه، أو قرصه في دراعه ده اسمه عنف غير معلن وبتلاقي الطفل وهو قاعد يروح يقرص أخوه الصغير نفس القرصة، أو مع زمايله في الفصل، والمشكلة إن هو بيبدأ يفهم إن دا طريقة للتعبير عن حقوقه أو لو حد جه على حقه بيستخدم فيه العنف.
الفرق بين العقاب والضرب
وأشارت دكتورة سهام: العقاب عموما أكيد ليه فوايد، لكن الضرب أكيد ملهوش فوائد، ومن أمن العقاب أساء الأدب، لازم النفس البشرية تعرفه إن زي ما فيه تحفيز وفيه مدح وفيه تشجيع فيه عقاب لو هي أساءت، وده بنعلمه للطفل، بس بعد لما بنعلمه بمعنى هي الحياة وإيه والسلوكيات المقبولة والسلوكيات المرفوضة.
وواصلت: الأمهات تقول أنها ميت مرة فهمته الصح والغلط، وهو مُصر إن هو يغلط، ولكن يجب أن تميز الأم أن خطأ عن خطأ بيفرق؛ في خطأ الطفل من وراه بيتعلم حتى يبدأ في اكتساب الخبرة والتجربة في الحياة وفيه الخطأ اللي هو الخطأ اللي بيأذي فيه نفسه، أو يؤذي به الآخرين، ده أنا أكون محددة فيه عدة مرات، وبعد تجاوزها أعاقب لكن بدون ضرب أو حرمان من أساسيات الحياة.
طرق التربية السليمة
وأكدت: أفضل طرق للتربية، هي أكيد إن أنا أكون قدوة صالحة لأولادي علشان يبدأوا إن هم يكرروا من ورايا سلوكيات الحسنة، أبعد عن إن أنا أكون شخصية مش سوية، بتمارس عنفها وغضبها ومرضها على أولادي، أنا محتاجة أشتغل على النفس والشفاء النفسي عشان خاطر إن أنا أطلع من بعدي جيل صالح للمعاشرة سواء بقى في الحياة الاجتماعية أو في الحياة المهنية أو في الحياة الأكاديمية.
وأردفت: الحاجة الثانية إن أنا أحط أنواع معينة خاصة للتحفيز أنا أشجع بها ابني وأنواع من العقاب.
