بعد تقديمها بلاغًا ضده.. شقيق شيرين عبد الوهاب: مش عايز شكلك يكون وحش قدام جمهورك وكنت بحمي بناتك

رد محمد عبد الوهاب شقيق الفنانة شيرين عبد الوهاب، على الاتهامات الموجهة إليه من قِبل شقيقته، وتقديمها أمس بلاغا رسميا ضده تتهمه باستغلالها والتنازل عن حساباتها ع السوشيال ميديا لصالح أحد المنتجين بموجب التوكيل الشخصي له.

شقيق الفنانة شيرين عبد الوهاب

وكتب محمد عبد الوهاب على حسابه الرسمي على فيس بوك: كل واحد عنده قدرة على تحمل الأذى لكن للقدرة دي حدود.. ده قرار النيابة العامة بالحفظ إداريًا في كل الاتهامات اللي اتوجهت ليا بتاريخ 19/12/2022 يعني من سنتين.

وتابع شقيق شيرين عبد الوهاب: ايه هي بقي الاتهامات دي؟ كسر الضلع والعشرين راجل اللي دخلت بيهم على اختي! وطبعا موضوع السكينة! واتسألت علي التوكيل بتاعي وبتاع امي من وكيل النيابة المحترم وكله مثبت، س سوال ج جواب. التوكيل اللي بتقول ان انا أسأت استخدامه!.

وأضاف محمد عبد الوهاب: وده إن دل على شيء فهو يدل على إني مش عايز أختي شكلها يبقي وحش قدام الناس وقدام جمهورها والأهم أمي اللي كنت مفهمها ان بنتها اتنازلت وانا  أستحمل أي حاجة إلا إنها تتوجع في ولادها. 

واستكمل محمد عبد الوهاب حديثه: وبناء عليه رضيت بالظلم لوحدي لكن الحقيقة غير كده، انا اتطلبت في النيابة واتسألت رسمي وتم اخلاء سبيلي من النيابة على ذمة القضية لحد مااتحفظت القضية بس انتي بقي بشطارتك وبأهل الشر اللي حواليكي اللي خسروكي نفسك وأهلك، خليتيني انهارده أطلع أقول جزء من الحقيقة للناس رغم إن ده آخر حل كنت أحب ألجأ ليه. وده حق ربنا لا ظلم ولا افترى. 

وقال محمد عبد الوهاب: ونفس الكلام اللي من سنتين بيتعاد تاني معرفش لمصلحة مين مع اني بعيد عنك وعن حياتك من سنين قبل الواقعة وسنتين من بعدها.  ده قرار النيابة العامة الموقرة في الافتراءات اللي اتوجهتلي، مش بيان من محامي. وأي حاجه هرد بيها هتكون مستند حكومي عليه ختم النسر. 

واختتم محمد عبد الوهاب حديثه: مرفق هنا الفيديو بتاريخ 11/11/022 اللي قولتي فيه انك اتنازلتي ولعبتي دور الضحية، ومرفق برضو المستندات الرسمية اللي بتثبت ان القضية فضلت شغالة  وكنتي هتتسببي في حبس أخوكي ظلم وهو لحد آخر لحظة بيحاول يحميكي ويحمي أمك  ويحمي بناتك.