أول تعليق من هاجر أحمد بعد تقدمها بشكوى بسبب تلف حقيبتها: مش هتنازل لأن فلوسي مش حرام| خاص
كشفت الفنانة هاجر أحمد، تفاصيل جديدة في شكواها التي تقدمت بها لـ جهاز حماية المستهلك، بسبب تلف حقيبة باهظة الثمن تساوي 5000 دولار ما يقرب من ربع مليون جنيه مصري من ماركة ديور Dior العالمية في مغسلة بالقاهرة الجديدة.
وقالت هاجر أحمد في تصريح خاص لـ القاهرة 24: مش هتنازل عن الشكوى لأن فلوسي مش حرام والشنطة معايا وبستعملها لكن باظت واتقطعت واتحرقت.
وأضافت هاجر أحمد: مش عايزة تعويض ولا أي حاجة بس كان المهم بالنسبالي الناس تعرف الموضوع ويأخدوا بالهم بعد كده، وياريت جهاز حماية المستهلك ياخد خطوة.
شكوى هاجر أحمد
وكانت كتبت هاجر أحمد منشورًا عبر جروب خاص بشكاوى جهاز حماية المستهلك بموقع فيسبوك، تحدثت خلاله عن تجربتها السيئة مع أحد المغاسل في القاهرة الجديدة، قائلة: تجربتي السيئة مع مغسلة، ليها فروع كتير في القاهرة الجديدة.
أضافت هاجر أحمد: من حوالي شهرين ونص، اتصلت بيهم اسألهم أن عندي شنطة غالية نوعها كريستيان ديور باهظة الثمن، وفيها بقعة كدة بالألوان بسيطة بنتي عملاها، وسألتهم هل تقدروا تشيلوا البقعة دي ولا لأ؟، قالولي طبعا يا فندم إحنا كل شغلنا شنط ماركات وشنط غالية، للعلم أن سعرها الشنطة حاليًا تقريبًا 5000 دولار.
تابعت هاجر أحمد: لأني عارفة إني لأزم أودي الشنطة للمكان بتاعها يظبطوها بس المشكلة أن أقرب مكان ليا دبي، وأنا مش مسافرة دبي الفترة دي أبدًا، بعد ما تواصلت معاهم أكدولي أنهم يقدروا ينضفوها بسهولة، وأنهم كمان بيستخدموا نفس المواد الكريستيان ديور بيستخدموها، قُلت أنا هديكم الشنطة وشوفوا هتعرفوا ولا لأ، لو لا ابعهتوهالي، وأكدت عليهم فوق الـ 50 مرة، قالولي إحنا عندنا فني بيحدد كمان هل يقدر يعمل كده ولا لأ ومش هنجازف يا فندم طبعًا.
