قضية الدارك ويب |غدا محاكمة المتهمين بجريمة صغير شبرا الخيمة
تعقد محكمة جنايات شبرا الخيمة، غدا الثلاثاء أولى جلسات محاكمة المتهمين بجريمة مقتل صغير شبرا الخيمة المعروفة إعلاميا بقضية "الدراك ويب".
قضية صغير شبرا الخيمة
وتعقد الجلسة برئاسة المستشار أيمن فؤاد فهمي، رئيس المحكمة، وعضوية المستشارين محمد عبد الواحد السيد عبده بحيري، ووليد أبو المعاطي محمد، وأحمد محمد محمود سعفان، وأمانة سر إيهاب سليمان حلمي.
وحصل القاهرة 24، على نص تحقيقات القضية رقم 1820 لسنة 2024 إداري قسم أول شبرا الخيمة، وجاءت أقوال قاتل صغير شبرا الخيمة كالآتي:
«اللي حصل إني من 11 سنة سبت البيت واتمرمط في الشوارع من مكان لمكان، ومكنتش لاقي حتة أقعد فيها، وفي شهر سبتمبر من العام 2023 اتعرفت على واحد اسمه محمد عزت وشهرته أبو حمزة، عن طريق صفحة على فيسبوك بتاعته اسمها سلمى، وهو سمسار أعضاء بشرية بيوفق المتبرعين والمرضى مقابل مبالغ مالية، فقالي إني ممكن أبيع كليتي مقابل 170 ألف جنيه - مائة وسبعين ألف جنيه، وبالفعل جابني بيته في شارع الحبيبي بشبرا الخيمة ثاني، ونزلني أشتغل في قهوة العديني في شهر أكتوبر، لحد ما عملت عملية استئصال الكلية اليسرى في المستشفى الجوي التخصصي، وبعت كليتي مقابل المبلغ المذكور، أخدتهم من أهل المريض في كافيتيريا المستشفى، وروحت».
وأضاف المتهم بقتل صغير شبرا الخيمة: في شهر يناير 2024، خالد العديني مشاني من الشغل عشان شديت معاه في الكلام عشان طريقته سيئة جدًا معايا، وقعدت في البيت اللي استأجرته في حارة البستان - شبرا الخيمة أول، وفرشته كويس بس الفلوس بدأت تخلص بعد ما بعت كليتي، فدخلت على صفحات الفيسبوك بتاعة التبرع بالأعضاء ودونت بيانات المرضى والمتبرعين عشان أحاول أوفق بين الحالات، بس معرفتش عشان سكتها كانت صعبة، فأنا عملت منشور على الصفحات بصفحتي الشخصية عرضت فيه فص كبد من عندي ولقيت واحد اسمه علي خالد تواصل معايا على رسائل الخاص، وقالي إن فيه مشروع أحسن من التبرع، إني أجيب طفل من 7 إلى 18 سنة، وشرط يكون رفيع مش تخين، وآخد منه عينات هتتباع بملايين.
وأردف المتهم: المرحوم أحمد صغير شبرا الخيمة كنت أعرفه من شغلي في قهوة العديني وترددي عليها كبون بعد ما سبت الشغل فيها، كنت بديله شيكولاتة وبعطف عليه، ومكنتش أعرف غيره، فبعت صورته لـ علي وقالي تمام ماشي، وقالي هنخدره وتاخده عندك الشقة تاخد العينات، وهيكلمني فيديو يشرحلي أعمل أيه علشان أخد العينات لما أطلع البيت، لأني مكنتش فاهم عينات أيه اللي عايزها غير إنها شوية دم عايزهم وخلاص.
واستكمل قاتل صغير شبرا الخيمة: وقبل التنفيذ بيوم بعتلي قائمة بالحاجات اللي محتاجينها، وكلمت واحد اسمه علي شغال عامل دليفري جنب قهوة العديني وبعتله القائمة قولتله أنا محتاجها من صيدلية عشان أخويا عيان، وكان فيها أدوية منومة وأمبولات وكانيولات وأنابيب وريدية وشاش وحاجات كتير تانية مش فاكرها، ورحتله أخدتهم من قدام الصيدلية مقابل 420 جنيه مش فاكر بالظبط، ويوم التنفيذ أخدت أقراص مهدئة كتير علشان متوترش ومترددش ورحت قعدت على القهوة.
وأردف: أنا عارف أحمد بينزل من بيته دائمًا متأخر على 10 بالليل يروح السايبر يلعب، وييجي القهوة يهزر مع الناس، فقعدت، وهو جالي قلتله أنا جايبلك هدية في البيت، هنروح مع بعض البيت أديهالك ونرجع تاني، وقلتله أمشي في الحارة اللي في وش القهوة وأمشي لحد شارع رشدي، وقابلته هناك واتمشينا مع بعض لحد البيت، وجبنا علبتين عصير تفاح، وطحنت قرصين منوم في البيت وفضيت العصير في كوباية وقلبته وشربته لأحمد.
واستكمل قاتل صغير شبرا الخيمة: كل شوية علي اللي كان في الكويت يكلمني على الماسنجر يقولي هيدوخ دلوقتي وصورهولي وابعتلي الصورة، واديت أحمد الريموت قولتله هات كرتون، قالي لا أنا تمام، وبالفعل ابتدا يدوخ فحطتله دوائين منومين في كوباية مية بالشرائط، وقلبت المية بالأقراص وهوه كان دايخ خالص، فمسكت رأسه وشربته الكوباية، فنام تمامًا، وعلي كلمني فيديو وقفل الصورة بتاعته وكان شايف اللي أنا بعمله بس قال لي هات حبل اخنقه بيه علشان نسحب العينات، فجبت حزام وجيت أخنقه لقيت أحمد صحي فجأة ورجع تاني على ضهره فخنقته بالحزام ومتحركش خالص بعد كده ومات.
