شقيقة فتاة التجمع ضحية أوبر: افتكرتها ماتت ورجعتلي وشها وهدومها مليانين دم| خاص
يستكمل القاهرة 24 نشر نص التحقيقات في قضية فتاة التجمع، والمدعوة نبيلة عواد، ضحية سائق أوبر المتهم باختطافها، والتعدي الجنسي عليها، وتهديدها بالقتل، وإصابتها في يدها بأداة حادة خلال استقلالها السيارة معه، لتوصيلها من منطقة التجمع الخامس للشيخ زايد.
نص تحقيقات قضية فتاة التجمع ضحية سائق أوبر
واستدعى رجال التحقيق بنيابة مدينة نصر، سالي عوض شقيقة نبيلة عوض المعروفة إعلاميًا بـ فتاة التجمع الخامس ضحية سائق أوبر، وإلى نص التحقيقات:
س: ما الذي حدث عقب نزول شقيقتك من القاهرة الجديدة؟
ج: هو بعد ما أختى نزلت ومشيت لقيتها بتكلمني وبتقولي إن السواق طلب منها إنها تلغي الرحلة، فأنا أخبرتها إنها متلغيش الرحلة علشان خاطر حفاظًا على سلامتها وأبقى متابعة خط سير الرحلة.
س: هل أخبرتك شقيقتك عن سبب رغبتها في إلغاء الرحلة؟
ج: هي قالتلي علشان خاطر السواق عاوز ياخد هو فلوس الرحلة لنفسه على المحفظة الخاصة به وده بناء على طلبه.
س: ما الذي حدث عقب ذلك؟
ج: أنا لقيت رقم بيكلمني وطلع السواق اللي اسمه حسين اللي هو قائد السيارة ويقولي إنه وصل، فقولتله إن المفروض السيارة وصلت وأختي ركبتها ومشيت.
س: ما التصرف الذي بدر من قائد السيارة الذي يدعى حسين؟
ج: هو قام بالرد عليا وقالي “ركبت طيب خلاص” وقفل.
س: ما الذي حدث عقب ذلك؟
ج: هو لقيت اتصال هاتفي من رقم آخر يخبرني أيضًا إنه من شركة أوبر وأخبرني بوصوله لمكان بدء الرحلة فرديت عليه قولتلوا إن أختي ركبت مع سائق آخر ومشيت.
س: ما التصرف الذي بدر منك آنذاك؟
ج: أنا قمت يفتح برنامج uber حتى أتمكن من متابعة سير الرحلة فتبين لي أن الرحلة قد ألغيت، ودخلت في حاله انهيار وحسيت إن أختي اتخطفت وقمت بالاتصال بشقيقتي كتير ولم تقم بالرد، وبعد كده لقيت مكالمة من تليفون أختي فرديت عليها ولقيت رجل اللي بيتكلم مش أختي، فقعدت أزعق وأقوله فين أختي فقالي اهدي لقيت أختك في الصحراء متغطية ببطانية فقولتله أنت مين فقالي إنه هو وصاحبه شافوها وعاوزين يوصلوها ليا فقولتلهم أنا عاوزة أسمع صوت أختي اطمن عليها فقالولي إنها مش قادرة تتكلم فافتكرت إنها ماتت ومش عاوزين يقولوا وبعد كده قعدوا يقولوا اهدي إحنا هنجبهالك دلوقتي فقولتلهم يقابلوني عند down town التجمع الخامس.
س: ما الذي حدث عقب ذلك ؟
ج: بعد كدة أنا قابلتهم وأخدت أختي على البيت وغيرت هدومها وغسلت وشها علشان كان مليان دم هو وهدومها، علشان قالت هروح القسم الأول أعمل محضر وبعدين قولتلها وإحنا في الطريق لازم نروح المستشفى الأول علشان ايدك بتنزف وتعمل تقرير طبي بالإصابات الثانية اللي في جسمك، ورحنا المستشفى الجوي في التجمع الخامس ولقوا إن في جرح عميق في صباعها الأيمن ومكانش في غرف بالمستشفى إنها تعمل عملية هناك وبعدين الشرطة كانت جت، وعملت محضر باللي حصل وأخدوا عليها تعهد إنها تروح النيابة لو طلبوها وبعدها رحنا على المركز الطبي العالمي اللى على طريق السويس عند الشروق ودخلت والدكتور كشف عليها وخيط إيديها وفضلنا في المستشفى بتاعت المركز الطبي العالمي لحد الساعة 5 صباحا وبعد كده روحنا البيت عندي في التجمع.
س: ما اسم ورقم وبيانات الشخص الذي قام بالتواصل معك لإخبارك بعثوره على شقيقتك؟
ج: هو اسمه مصطفى محمد.
س: هل معك تصوير خاص بالواقعة؟
ج: لا هو موجود بكاميرات الكمبوند اللي أنا ساكنه فيه.
س: ما قولك فيما أقرته وشهدت به شقيقتك المجني عليها نبيلة عوض استدلالًا وبتحقيقات النيابة العامة؟
ج: أيوة ده اللي حصل وقولت عليه.
س: هل من ثمة علاقة أو خلافات بينك وبين أي من أطراف الواقعة؟
ج: لا.
س: هل لديكي أقوال أخرى؟
ج: لا.
