شمس البارودي تتحدث عن نجلها عبد الله: اتطمنت على مكانته.. وروحه بتتمتع بالحرمين
تحدثت الفنانة المعتزلة شمس البارودي، عن نجلها الأصغر عبد الله، الذي اقتربت ذكرى رحيله الأولى، حيث رحل عن عالمنا يوم 30 يوليو العام الماضي، غرقًا بالساحل الشمالي.
وقالت شمس البارودي، في تصريحاتها الخاصة لـ القاهرة 24: اتعمل حاجات خير لعبد الله، الحمد لله من وقت وفاته لكن مش هنقول عليها بس الحمد لله كل حاجة اتعملت وبزيادة عشان روحه تبقى مرتاحة، الحمد لله بيجيلى وبييجي لـ أبوه الحمد لله، قلبي مرتاح الحمد لله، واتطمنت عليه وعلى مكانته بفضل من الله ونعمة.
وأضافت شمس البارودي: فيه ناس معرفهاش بتعمل خاتمة قرآن لـ عبد الله، الحمد لله وهو حبيبي كان قبل وفاته بـ 5 أيام بيقول عايز أروح مكة، وإحنا بنروح هناك وبنعمل عمرة كتير، وأنا بقول روحه هناك وبيتمتع بالحرمين والله أعلم، كل غيب في يد الله وإحنا مؤمنين بقضاء الله ولكل أجل كتاب وكلنا رايحين مفيش حد قاعد، وإن شاء الله يكون لقائنا معاه في الجنة لأنه شهيد.
شمس البارودي تُعلن اعتزال حسن يوسف الفن نهائيًا
كما أعلنت شمس البارودي، اعتزال زوجها الفنان حسن يوسف الفن نهائيًا، موضحة أنه لم يستطع العودة لممارسة حياته بشكل طبيعي منذ وفاة نجلهما عبد الله، قائلة: الراجل أعلن اعتزاله خلاص وأنتم مش فاهمين أن إحنا في حالة حزن واللي مش حاسس باللي إحنا فيه ربنا يصيبه بما أصابنا، يعني أنا بقول ربنا يصيب اللي هما مش حاسين باللي إحنا فيه، إحنا فاقدين ابننا في إيه يعني؟.
وأضافت شمس البارودي: ربنا يصبرنا وده واحد قال إنه اعتزل عشان هو مش قادر خالص يمارس أي حاجة بعد وفاة ابنه، ومش عايز يرد عليكم وده حقه، دي حاجة غريبة جدًا.
وفاة نجل حسن يوسف وشمس البارودي
وحالة من الصدمة أصابت عائلة الفنان حسن يوسف وزوجته الفنانة المعتزلة شمس البارودي بعد وفاة نجلهما عبد الله عن عمر ناهز 35 عامًا، غرقًا في الساحل الشمالي، وهو الابن الأصغر للفنانين، ودرس الطيران في أوكرانيا، كما حصل على بكالوريوس إعلام من جامعة بيروت.
