بعد السخرية من ظهوره بنظارة سوداء.. تامر أمين: تجاوز وتعدٍّ.. والمفروض نطبطب على بعض
أعرب الإعلامي تامر أمين، عن استيائه الشديد بسبب سخرية البعض من ظهوره بنظارة سوداء في برنامجه “آخر النهار”، وذلك بعد إصابته في العين اليسرى وإجراء عملية جراحية.
وقال تامر أمين في برنامجه: في حالة من حالات العنف والتجاوز والتعدي والاصطياد، ده موجود عند جزء من الناس، ومش عارف سببه إيه؟، مردفًا: صعوبة الأوضاع المفروض تخلي الناس أحن على بعض، وقلبها على قلب بعض وكتفها في كتف بعض، مش تاكل وتعض وتهبش في بعض، سلوك غريب، ومحدش عارف يفسر السلوك العدواني اللي عند الناس، مش هتهون غير لما نطبطب على بعض مش لما نخلص على بعض".
واستكمل: امبارح بعض الفيديوهات ليا نزلت على السوشيال ميديا، وأنا طالع بنظارة شمس غامقة بسبب أني عملت عملية في عيني وشرحت ده في الحلقة، لأن الضوء المباشر في الاستوديو هيضرني ضرر بالغ، لقيت بعض التعليقات اللي على الفيديوهات ماشية في سكة إيه يا عم ده جاي يورينا جمال نضارته، ده واضح أن الشمس جامدة في الاستوديو وإني تنك، محدش افترض لـ لحظة أن عندي سبب.
وأردف: “لا أنا شخصيتي ولا تاريخي ولا العقل يقول كده، اكتشفت أن المزاج العام عند الناس هجومي، ألوش بكلمتين وبعدين يحلها الحلال، القصة صعبة ومش هتمشي وتعدي بالاصطياد لبعض كده، الحياة بتهون رغم صعوبتها بالطبطبة”.
تامر أمين يكشف تفاصيل إصابته وخضوعه لعملية جراحية بالعين
وكان الإعلامي تامر أمين، كشف تفاصيل إصابته وخضوعه لعملية جراحية في العين، قائلًا: الحمد لله الذي ابتلانا، والحمد لله الذي عافانا، والحمد لله الذي شفانا، ربنا قدر ولطف، كان عندي مشكلة كبيرة في عيني اليُسرى، وكان لا بد من عملية جراحية عاجلة وتقيلة، لعملية تطلبت تخدير كُلي، واستمرت حوالي 4 ساعات ونص، وكانت عملية تقيلة بمعنى الكلمة، والحمد لله الذي قدر فلطف وقدر فهدى، والحمد لله جدًا على ابتلائه أنا راضي به، وإن شاء الله أنا ماشي في سكة العلاج لكن وحشتوني، فقررت أن أنزل لحضراتكم ولكن معلش استحملوني.
