رئيس جهاز الكرة بنادي النصر: تكافؤ الفرص أمام بيراميدز غير موجود.. وإحنا مش جاهزين
عبّر محمد عبد الفتاح رئيس جهاز الكرة في نادي النصر القاهري عن غضبه بشأن تأجيل مباراة بيراميدز، من جانب اتحاد الكرة المصري أكثر من مرة.
رئيس جهاز الكرة في نادي النصر: تكافؤ الفرص أمام بيراميدز غير موجود.. وإحنا مش جاهزين
وقال محمد عبد الفتاح في تصريحات تليفزيونية قبل بداية المباراة: كل ما نستعد ونجهز المباراة تتأجل، ولسة في فترة الإعداد ومش جاهزين لمباراة كبيرة زي دي.
وأضاف: كان محدد أن المباراة ستقام في العيد، وتم تأجيلها لاستدعاء 3 لاعبين من بيراميدز لمنتخب مصر، وادينا اللاعيبة إجازات وراحة سلبية، وكان فيه كلام ووعود إن المباراة كان ممكن تتأجل لحين جاهزيتنا.
وأكد محمد عبد الفتاح: الفترة اللي تدربنا فيها مش كافية، ولكننا نحترم كيان نادي النصر، ومقولناش انسحاب وكل الرياضيين متفقين مع كلامي لأن فترة الإعداد لماتش كبير زي دا بيلغي تكافؤ الفرص، وجالنا وقت كنا جاهزين جدا نلاعب بيراميدز، ولكن كم التأجيلات اللي تم هيأثر علينا.
وأردف: أنا مبقولش مبررات والكل موجود في أرضية الملعب زي ما واضح، ولكن أنا بتكلم في حاجة فنية وآخر ماتش لينا كان 26 أبريل والماتش كان 3 مايو والنهاردة 15 يوليو.
وتابع: التأجيلات مش بمزاجنا ودي حاجات خارجة عن إرادتنا، وإحنا كيان كبير وهنعمل اللي علينا ولكن تكافؤ الفرص في الجاهزية مش موجود، واللاعيبة لسة موصلتش لفورمة المباريات، ولكن أؤكد أننا بنحفز اللاعيبة اللي عندهم إصرار لتقديم مباراة قوية.
واختتم محمد عبد الفتاح تصريحاته قائلًا: احنا نادي كبير، ويكفي إن عندنا 3 لاعبين من بيراميدز هم ولادنا في النصر: أحمد سامي وإسلام عيسى ومروان حمدي، فـ احنا نادي كبير وكان المفروض يبقى فيه تقدير أكتر من كدة ومفيش قطاع ناشئين أصلا، اللي كان ممكن أعتمد عليه في مباراة زي دي.
