فتاة تشكو من سوء معاملة ميكب أرتيست بالمنوفية: بتستغل الظروف وتطلب فلوس زيادة
نشرت فتاة تدعى حبيبة السيد، منشورًا عبر خاصية ستوري بموقع تبادل الصور والفيديوهات إنستجرام، حول تعرض شقيقتها لموقف مؤسف يوم خطوبتها، برفض الميكب أرتيست إجراء باقي عملها المتفق عليه، قبل حفل الخطوبة ببضع ساعات.
شكوى من ميكب أرتيست
وقالت حبيبة السيد، في تصريحات خاصة لـ القاهرة 24: امبارح كانت قراية فاتحة أختي وعاملينها في البيت في حضور عائلي، وكانت حاجزة ميكب سواريه مع ميكب أرتيست في شبين الكوم بقالها 3 أو 4 أيام، ودافعة مبلغ مالي ومأكده الحجز والمواعيد وكله تمام، ونزلت إمبارح من البيت الساعة 5 عشان تروح تعمل الميكب المتفق عليه.
وأضافت، الميكب أرتيست لما عرفت إن دي عروسة والنهاردة قراية فاتحتها استغلت الظروف ورفضت تعملها باكدج الميكب المتفق عليه واللي مدفوع له فلوس مقدمًا، وبدأ تقولها إنتي عروسة؟ أنا عندي قواعد للمكان قراية الفاتحة والخطوبة بسعر تاني وإنتي مفيش عندك حل غير إنك تدفعي تمن باكدچ الخطوبة.
وتابعت حبيبة السيد: لما اتكلمنا معاها وحاولنا نفهم أسبابها في تمسكها بباكدج الخطوبة وإحنا طالبين سواريه، ردت قالت ما العيشة مرتاحة وفي فلوس، إنتي عارفة أنا بدفع إيجار كام؟.. مفيش قدامكم غير إنكم تدفعوا لأن مفيش وقت والخطوبة كمان ساعتين، وأختي نزلت من عندها معيطة وقفلتلها اليوم ونكدت علينا، وفي الآخر نزلنا من عندها بسبب سوء المعاملة.
واستكملت حبيبة: ليه تنزلي عروسة من عندك معيطة أو متضايقة يوم قراية فاتحتها وترفضي تعملي لها ميكب وهي مختاراكي جزء من يومها، ولما نزلت على السوشيال ميديا احكي عن الموقف لقيت إن في أكتر من عروسة تعرضت للموقف دا عندها، لدرجة إن في بنات كانوا شغالين معاها بعتولي يشتكو منها وقد إيه هي بتستغل الظروف وبتطمع في أي عروسة تدخل المكان عندها.
وأكدت حبيبة أن هناك العديد من الفتيات التي تجاوبن مع المنشور، مؤكدين تعرضهن لمواقف مشابهة من نفس الميكب أرتيست، مشددين على عدم التعامل معها مجددًا.
