سوما تكشف موقفًا إنسانيًا لأصالة في مرضها: طلعتني عمرة خلال رحلة تعبي
تحدثت المطربة سوما عن مساندة المطربة أصالة لها خلال فترة مرضها والتي تسببت في ابتعادها عن الغناء سنوات طويلة.
وقالت سوما خلال ندوتها بالقاهرة 24، إن أصالة أكثر من ساندتها ووقف بجانبها خلال رحلة مرضها بخلاف المنتج نصر محروس الذي دعمها كثيرًا، مشيرة إلى أن لأصالة الكثير من الموقف معها منها أنها ساعدتها في أداء العمرة رغم صعوبة الأمر حينها بسبب كورونا.
سوما: أصالة طلعتني عمرة
وأوضحت سوما: أصالة وقفت جنبي ولحد إمبارح مش سيباني ولما عرفت إني تعبانة ما شفتش حد ممكن يدعم حد زي ما هي عملت معايا، وفي فترة من الفترات كنت على كرسي مش بتحرك وكانت بتطمن عليا طول الوقت وقالت لي نفسك في إيه وأعمله ليكي، قلت لها الأطباء عجزوا عن تشخيص مرضي وعاوزة أروح لربنا بيته وأعمل عمرة وكان وقت كورونا والحرم مقفول ومكانش فيه حجر فقالت لي لو وصل بيا الأمر أوصل الأمر للسحاب هعمل كده، وكانت إنسانة جدا وطلعتني عمرة وخلتني ادخل الحرم.
وأضافت أصالة: كان عندها حفلة هناك مع جوزي المايسترو مصطفى حلمي وقالت لي هتطلعي ويكون معاكي جوزك، وقالت لي تحبيها النهاردة ولا بكره قلت لها دلوقتي وعملتها خمسة الفجر.
وتابعت سوما: ناس كتير سألوا عليا وكانوا عاوزين يساعدوني وأنا كنت بعيدة أوي ومش حابة إن حد يشوفني في المرحلة دي ومنهم مي فاروق وهاني شاكر وريهام عبد الحكيم وإيناس عبد الدايم وجيهان مرسي، وعلموا لي حاجات كتير.
