تيك توكر شهيرة خلال التحقيقات: موظف قالي حماكي ركبلك كاميرات مراقبة داخل غرفة النوم
كشفت التحقيقات في واقعة اتهام تيك توكر لحماها رجل أعمال وآخرين، بوضع كاميرات داخل غرفة نومها الخاصة والحمام لالتقاط صور خاصة لها بملابس المنزل، عدة مفاجآت، وذلك في أثناء وجود زوجها داخل مركز الإصلاح والتأهيل لقضاء فترة عقوبة في إحدى القضايا.
وجاءت أقوال التيك توكر في التحقيقات: اللي حصل إن اتجوزت سنة 2019 وخلفت ولد وبنت وفي 2021/5/29، جوزي اتحبس في قضية سلاح واخد 5 سنين، في الوقت ده أنا لقيت نفسي أنا وأولادي قاعدين لوحدنا في البيت فا كنت من وقت للتاني بأخد أولادي وبنروح نزور حمايا وده عشان أقرّب الولاد لجدهم اللي هو حمايا.
وأضافت التيك توكر: في يوم 2023/4/22، لقيت تليفون جالي من موظف عند حمايا في الشركة، وقالي إن هو عرف إن حمايا مركبلي كاميرات تجسس جوه الفيلا بتاعتي في أماكن هعرف أوصلها وقالي خدي بالك من نفسك، فا أنا قعدت أفكر في الموضوع وربطت اللي قالهولي الراجل ده بأن كان في يوم 2023/3/13، كان في عمال عندي في الفيلا على أساس إن هما كانوا بيركبوا الخط الأرضي والانترنت في الفيلا.
وتابعت التيك توكر: أنا ساعتها كنت في النادي مع الولاد والشغالة هي اللي كانت واقفة معاهم وعرفت من الشغالة إن العمال دول في اليوم ده كسروا في الحمام، وساعتها أنا لما جمعت الكلام ده كله رحت دورت في الفيلا عن الكاميرات فلاقيت كاميرات غريبة في الحمام اللي في أوضتي الشخصية وفضلت اتبع الوصلات بتاعت الكاميرات لغاية لما لاقيت الدي في أر بتاع الكاميرات دي وقطعتها وفصلتها.
وأردفت خلال التحقيقات: بعدها أنا شغلت الي في أر على التليفزيون عشان أشوف من خلاله اللي متسجل عليه وساعتها لقيت عليه فيديوهات ليا وأنا في البيت، وفيديوهات تانيه وأنا في أوضة النوم وكمان وأنا في الحمام وأنا بغير هدومي، بعدها تاني يوم الصبح 2023/5/23، لقيت حمايا جالي البيت عشان كان أكيد عرف إني لاقيت الكاميرات وكان معاه ابنه وكمان شخصين وكان معاهم محامي.
واستكملت: ولقيتهم قافلين على عربيتي وفضلوا يزعقوا عشان أفتح ليهم باب الفيلا لغاية لما الشغالة فتحتلهم الباب ودخلوا واتفاجئت إن هما قعدوا وطلعوا ورق وعقود وقالولي تعالي أمضي على العقود، وأسيب البيت وإلا هياخذوا منى أولادي وهيلبسوني قضية مخدرات وينشروا صوري والفيديوهات اللي صوروهالي من الكاميرات اللي كانوا حاطينها لي في البيت، فا أنا لقيت نفسي في موقف صعب
وساعتها خوفت منهم وخوفت على أولادي فا أضطريت أنفذ اللي طلبوه غضب عني.
وتابعت: ساعتها أدوني 3 عقود مضيت عليها غصب عني من غير ما أعرف مضوني على ايه، وكان منهم عقدين لونهم أزرق وواحد لونه أبيض، فا أنا قولتلهم هاتوا واحد منهم أخليه معايا وأدوني العقد اللي لونه أبيض ورحت واخذه أولادي ومشيت وهما كانوا أخدوا حاجتي وعربيتي ومفاتيح البيت وكل حاجة ورحت قعدت عند والدتي وفضلت فترة مش عارفة أعمل معاهم ايه لغاية لما وكلت محامي وعملنا عريضة باللي حصل وكمان رفعت قضية تمكين عشان أرجع لبيتي وأخذت حكم بالتمكين في شهر 10 اللي فات.
وأكملت التيك توكر أمام جهات التحقيق: ساعتها رجعت البيت، لكن لقيت شقيق جوزي باعتلي رسائل تهديد على التليفون وطلب مني أسيب البيت وأتنازل عن التمكين ونفقة الصغار وإلا هينشروا صوري والفيديوهات اللي صورهالي من الكاميرات اللي كانوا حاطينهالي في البيت.
